Iha loron 29 fulan Jullu tinan ne’e, Laboratóriu Nasional Saúde (LNS) haruka amostra 20 husi Munisípiu Ermera ba Peter’s Dohert Institute iha Melbourne-Austrália hodi halo teste.
Tanba ne’e iha loron 7 fulan Agustu tinan ne’e, rezultadu sekuensiasaun genómika hatudu, husi amostra 20 ne’e na’in 12 mak identifikadu ho variante Delta, maibé dadaun ne'e sira nia kondisaun la grave.
“Kona-ba tratamentu, laiha diferénsia ho COVID bai-bain, ida ne’ebé halo diferénsia mak nia-nia agressividade atu hada’et, iha na’in 12 ne’e la iha ida mak grave, na’in 10 iha Ermera no nain rua (2) iha Díli,” informa Nilton do Carmo da Silva,ba Jornalista sira, Segunda (09-08-2021) hafoin partisipa Workshop kona-ba TBC iha Hotel Novu Turismo.
Atu kombate variante foun ne’e, Nilton apela komunidade hakbesik ba sentru saúde atu hetan vasina.
“Husu ba maluk sira liu-liu iha Ermera semak seidauk Vasina atu bele hakbesik-na ba fatin vasina simu vasina” nia husu.
Atualizasaun dadus husu SIJK hatudu, kazu ativu iha munisípiu Ermera 700, kazu rekoperadu 100 resin, kazu kumulativu COVID-19 hamutuk 900 resin.
To’o oras ne’e Timor Leste rejista ona kazu konfirmadu COVID-19 11.529, kazu rekoperadu 10.127, kazu ativu rihun ida resin 1.375, no kazu mate 27.Lau
