Reprezentante família matebian Agapito Barros, lamenta servisu atendimentu pesoál saúde sira nian ne’ebé la profisionál, tanba la konsege salva pasiente COVID-19, Serafina Gomes ho oan (bebé) nia vida.
“Ami-nia laran triste iha situasaun ne’ebé mak emejénsia loloos ne’e koko lai bebé ne’e, no salva lai bebé ne’e, husi inan nia knotak, tanba nain rua ne’e mate hotu kedas” lamenta família matebian, iha sentru izolamentu Vera-Cruz, Díli Tersa (11/08).
Agapito esplika, teste PCR ba matebian Serafina Gomes ne’e halo iha ospitál referénsia Maliana, hafoin teste PCR hatudu rejultadu hatudu pozitivu COVID-19, pesoál saúde sira ta’uk, no la besik ba pasiente ne’e.
Ho rejultadu ne’e mós, pesoál saúde sira transfere kedas pasiente ho kondisaun grávida ne’e, ba sentru izolamentu Vera-Cruz hodi halo operasaun, maibé bebé mate tiha oan iha inan nia knotak.
“Tanba test swab uluk bebé nia inan ne’e, dehan positif Covid, entaun hotu-hotu la besik, até doutór la besik, ida ne’e ami nia laran triste tebes, tanba ami lakon ema na’in rua dala ida” dehan família.
Vise Koordenadora Forsa Tarefa Prevensaun no Mitigasaun Surtu COVID-19, Odeta da Silva Viegas, hatete, nia parte sei buka hatene informasaun ne’ebé mak akontese iha terenu.
“Situasaun sira akontese dalaruma erru mos husi parte ami nian karik erru mos husi parte familia maibe situasaun ne’e hau seidauk rona,” konfirma Odete.
Serafina Gomes transfere husi Ospitál Referénsia Maliana, iha loron 8 fulan ne’e ho diagnóstiku isin-rua, oan ba dala tolu ona, laiha istória abortu.Eni
