Koordenadór Pillar VII, Nilton do Carmo da Silva, hatete, sidadaun na’in haat (4) mate iha sala izolamentu Vera Cruz posibilidade infetadu husi variante Delta.
Tanba ne’e parte saúde haruka ona amostra ba Austrália hodi halo sikuénsia genómika, nune’e bele hatene lolos tipu virus saida mak afeta ba mate-isin na’in haat ne’e.
“Loron rua ikus horseik no ohin, ita mós iha kazu óbito hamutuk na’in 4, horseik na’in 3, ida ohin dadersan mak foin i’is kotu, em relasaun nia delta ou variante seluk, ita bele haree pontu ida, ita haree evolusaun kazu agora maka’as loos, segundu ita haree iha ninia istória epidemólojia ita bele dehan katak iha possibilidade,” informa Nilton do Carmo da Silva, ba Jornalista sira iha nia knar fatin Caicoli-Díli, Segunda (16/08).
Tuir dadus ne’ebé GMN asesa husi Sentru Integradu Jestaun Krije (SIJK) iha Segunda loron 16 fulan Agustu ne’e hatudu, rezultadu sekuénsiasaun jenómika konfirma, variante Delta da’et ona iha komunidade Ermera nia leet, liu-liu iha Gleno, Ermera Villa, ho Railaco.
Tuir publikasaun SIJK nota katak, posibilidade boot variante Delta sirkula mós iha Munsípiu ne’ebé númeru kazu sa’e maka’as hanesan Díli (kazu foun 68, kazu ativu 887), Covalima (kazu foun 15, kazu ativu 180), RAEOA (kazu foun 10, kazu ativu 98), Bobonaro (kazu foun 3, kazu ativu 78), Ainaro (kazu foun 3, kazu ativu 35), Aileu (kazu foun 6, kazu ativu 32), Baucau (kazu foun 0, kazu ativu 54), no Liquiça (kazu foun 5, kazu ativu 35).
To’o oras ne’e Timor-Leste rejista kazu konfirmadu komulativu COVID-19,12.682, kazu rekoperadu 10.508, kazu ativu 2.141, kazu óbitu 33, no sidadaun ne’ebé mak pozitivu ho variante delta hamutuk 17.Eni
