Sentru Saúde (SS) Guisarudu, Postu Administrativu Hatolia B, Munisípiu Ermera posibilidade sei taka provizóriu, tanba pesoál saúde na’in lima pozitivu COVID-19.
Xefe SS Guisarudu, Maria Madalena Mali, informa, profisionál saúde sira ne’e, pozitivu coronavirus, hafoin fila husi Ermera Villa, tanba hetan konvite husi Diretór Servisu Saúde Munisípiu hodi partisipa iha enkontru balun iha Ermera Villa.
“Buat ida enkontru agora iha Munisípiu ne’e pozitivu delta tiha ona, mais atividade enkontru la’o nafatin, entaun ami hanesan serví na’in ne’e ami la komprende, ami atu rona ba se agora ami la ba ami sala, sei iha konvite mai husi Diretór Servisu Saúde Munisípiu, dehan ohin iha enkontru hakarak ka lakohi ami tenki ba,” hateten Xefe SS Guisarudu, iha Hatolia, Ermera, Sábadu (14/08).
Nia esplika, pesoál saúde na’in lima ne’e, kompostu médiku ida, parteira ida, locket na’in rua, no saúde públiku ida. Profisionál saúde sira “pozitivu ne’e vasina dala-rua hotu ona” tenik nia.
Vise Ministru Saúde Bonifácio Maucoli dos Reis, konfirma, Ministériu Saúde (MS) iha ona rekrutamentu ba internatu sira, no sei apoia Rekursu Umanu (RH) ba iha SS ne’ebé hasoru hela situasaun ne’e, hodi kontinua atendimentu ba komunidade.
“Ho rezultadu ne’ebé mak agora ita nia pesoál na’in 5 pozitivu ona, agora ita iha rekrutamentu ba internatu sira, ita sei apoiu rekursu umanu mai tan iha ne’e atu bele suporta iha sentru saúde ida ne’e” dehan Vise MS ne’e.
Tuir dadus ne’ebé JNDiário asesa husi pájina ofisiál Ministériu Saúde iha loron Domingu 14, fulan ne’e hatudu, kazu konfirmadu foun COVID-19 iha Munisípiu Ermera 28, kazu rekuperadu 34, kazu ativu 695, kumulativu rekuperadu 305, kumulativu konfirmadu 1000.Eni
