Institute Of Business (IOB), reativa ona aulas iha semana kotuk, maibé estudante sira tama iha areadór eskola, tenke hatudu kartaun vasina kompletu.
Reitór IOB, Pedro Miguel Barreto Ximenes hatete, regra ne’ebé instituisaun aplika ne’e, bazeia ba rekomendasaun sira husi Ministériu Ensinu Superior Siénsia no Kultura, Organizasaun Mundiál Saúde nian, nune’e hamenus risku transmisaun coronavirus.
“Hanesan ha’u hatete ona ita implementa ona regras husi Organizasaun Mundiál Saúde (OMS), regirozu tebes, ha’u fo ezemplu sira ne’ebé mak tama ona iha ita nia área kampus hot-hotu tenki-ser lori kartaun kinur,” dehan reitór ne’e, iha seremónia Yudisium ba Finalista IOB, iha Salaun Audotorium IOB, Plaza Fomento II Díli, Sábadu (07-08).
Ba estudante ne’ebé ho idadae 17 ba leten seidauk simu, reitór ne’e enkoraza atu simu vasina, nune’e bele kontinua aula aprendisajen hanesan bai-bain.
“Ba estudante sira ne’ebé mak iha moras todan sira bele ba husu atestadu médiku ba iha Sentru Saúde ne’ebé nia konsulta ba, ita bele fó sira tama iha aulas, maibé seim iha razaun ruma entaun ita labele husik sira tama aula,” tenik nia.
Dadus ne’ebé aprezenta hosi reitór ne’e, dosente no funsionáriu administrasaun IOB nian simu ona vasina primeiru doze atinji ona %95, no sira ne’ebé mak simu vasina ba segundu doze atinji ona %70.Eni
