Diretór Sentru Estudu ba Paz no Dezenvolvimentu (CEPAD-sígla portugés), João Boavida konsidera, Timor-Leste (TL) seidauk iha nia sistema rasik atu kombate hasoru virus ne’ebé mosu iha komunidade nia leet.
“Ba hau atu krítiku uitoan, atu pesimista uitoan, hau hanoin ita nia saúde iha Timor Leste laiha sistema ida ne’ebé ke bele rejisti flu deit, inus metin, mear bai-bain seidauk bele rejisti, sa-tán atu rejisti Delta,” dehan Diretór CEPAD, João Boavida ba Jornalista sira, Segunda (23/08).
Diretór ne’e afirma, T-L rejista ona variante Delta ne’e nia implikasaun ba servisu saúde hetok aat-liu, tanba laiha sistema atu luta hasoru variante ne’e.
No faktu ne’ebé iha mak, sentru izolamentu sira hanesan Lahane, Vera Cruz, Tasi-Tolu no seluk tan, laiha fasilidade saúde ne’ebé adekuadu atu atende pasiente ne’ebé kona-ba virus.
Nia afirma tan, desizaun sira Governu deside hodi kombate kalamidade ne’e, polítiku sira rasik viola, nune’e impaktu mós ba komunidade kontinua la tauk COVID-19.
“Pontu ida sira hamosu tiha Estadu Emerjénsia, no iha pontu ida sira kontinua tun ba halo kampaña, ne’ebé konfuzaun boot ida” kestiona João Boavida.
Situasaun sira ne’e la’o diak, presiza lealidade polítiku sira nian, no servisu administrasaun públiku sira tenke servisu ba Estadu, la’os servisu ba ema ne’ebé fó ita servisu.
“Ne’e mak patraun kliente, dehan hau simu husi hau nia maun boot, hau nia bin boot, ne’ebé se ita-boot sai ministru, ita tama ba ministériu, ita nia loyalitas la’os ba instituisaun ne’ebé ita servisu ba, maibé ba maun boot ne’ebé hatama ita servisu, ah nia fukun mak ne’e” tenik nia.
Iha inísiu fulan Agostu ne’e, pasiente isin-rua pozitivu COVID-19 ne’ebé mate iha sala izolamentu Vera Cruz hamutuk na’in tolu ho sira nia bebé (3), bainhira halo operasaun.Eca
