GMN TV Saude e Educação Proposta sosa tan mákina fase ran aprovadu

Proposta sosa tan mákina fase ran aprovadu

0 views

Proposta ne’ebé aprezenta husi deputada bankada CNRT, Maria Barreto, hodi husu governu atu sosa tan mákina fase ran nian 4 ba Hospital Nacional Guido Valadares (HNGV) pasa iha diskusaun espesialidade iha Parlamentu Nasionál (PN) ho votus a favor 60, kontra 0 no abstensaun 12.

Deputada proponente ne’e argumenta, HNGV presiza aumenta tan mákina fase ran nian, atu nune’e mákina balun ne’ebé mak dadaun ne’e iha labele avaria lalais, tanba uza troka malu.

“Proposta ne’e atu sosa mákina no ekipamentu non médiku ne’ebé mak HNGV presiza,  hanesan mákina HD ne’ebé mak uza fase ran, tanba agora dadaun HNGV iha mákina 10 de’it, husi mákina 10 ne’e 2 ita rezerva ba pasiente sira ne’ebé TBC ho moras sira seluk, no mákina 8 mak uza ba pasiente normal, kada mákina loron ida atende pasiente nain 3, ema ida kuaze oras 4, ho situasaun ida ne’e, mákina ne’ebé mak iha la deskansa,”klarifika deputada CNRT ne’e iha diskusaun OJE faze espesialidade ba loron datoluk nian iha PN, Tersa (04/09/2018).

Deputada proponente ne’e justifika tan, razaun fundamentu seluk ne’ebé obriga nia parte halo proposta, hafoin halo audiénsia ho ministériu saúde, gastu ba alokasaun pasiente ba estranjeiru atu fase ran ne’e ás liu, kompara ho fase ran iha rai laran.

“Iha razaun ida seluk ne’ebé ami hato’o mak númeru pasiente aumenta ba bebeik, bazeia ba proposta ne’ebé ami simu husi ministériu saúde, iha 24 fulan kotuk, agora dadaun ita iha pasiente 73 no mós iha pasiente 14 mak haruka ona liur, tanba ita-nia mákina labele atende pasiente sira ne’e hotu, Ita halo komparasaun ba gastu pasiente fase ran nian iha Timor ho pasiente ne’ebé mak ita haruka ba fase ran iha rai liur, ne’e ema nain 14 ne’ebé mak ita haruka ba ho nia gastu montante US$828,495, se ita fase ran iha Díli ho pasiente 56 ne’e ita gastu de’it mak US$1,170  liu, ne’e hatudu katak, pasiente ita haruka ba rai liur ho nia gastu karun tebes, kompara ho pasiente 56 ne’ebé mak fase ran iha Díli,  tanba ne’e mak HNGV presiza tan mákina fase ran 4, atu bele responde ba númeru pasiente ne’ebé mak ás, no bele fó deskansa ba mákina atu la avaria,”argumenta deputada Maria Barreto.

Hatan rekomendasaun hirak ne’e, Ministra interina Planu Finansa (MPF), Sara Lobo Brites, hateten, governu sei tau iha konsiderasaun ba proposta ne’e, tanba kestaun saúde nu’udar preokupasaun ba sidadaun hotu nian.

“Saúde ne’e ita hotu preokupa, tanba ne’e atu sosa mákina ne’ebé bele atende moras ita-nia sidadaun sira nian, iha modalidade ida ne’ebé ami sei uza, liu-liu hanesan SAMES mak sei trata ida ne’e, ami hanoin hela, karik ekipamentu sira ne’e sosa liu hosi LC para bele fasilita ba akizisaun ba mákina sira ne’e,”dehan Ministra Planu Finansa interina.

Iha prosesu diskusaun ne’e mós, deputadu bankada UDT/Frente-Mudansa, Gilman Exposto, fó apoia ba proposta ne’ebé aprezenta husi deputada CNRT ne’e atu aumenta mákina fase ran ba HNGV, tanba ne’e importante ba ema nia saúde.

Tanba ne’e nia parte sujere mós ba VIII Governu, atu labele sentraliza de’it mákina fase ran ne’e iha munisípiu Díli, maibe fo mós ba munisípiu seluk, atu nune’e pasiente labele mai hotu de’it iha Díli.

Husi Orsamentu Jeral Estadu tinan 2018 billiaun US$1.2 ne’e, governu prevé ba ministériu saúde hamutuk millaun US$42,709, kompostu salariu vensimentu US$22,161, Bens Servisu US$8,065 no transferensia públika US $12,433 inklui kapital menor USD $50 mil.Say


Banner

Foto

Notisia Ikus

Singapura mak trava TL tama ASEAN, LUGU: Horta bele konvense

May 18, 2022
Diplomata senior Timor-Leste, José Luis Guterre...

Delegasaun Angola hasoru PR eleitu

May 18, 2022
Prezidente Repúblika (PR) eleitu, José Ramos H...

PR Lú Olo: Tempu ona atu halo revizaun ba K-RDTL

May 18, 2022
Prezidente Repúblika (PR), Francisco Guterres L...

PN aprova Projetu-Lei responsabilidade PR iha finál globál

May 17, 2022
Parlamentu Nasionál (PN) Kinta Lejislatura, apr...

PR Lú Olo kondekora veteranu 83

May 17, 2022
Prezidente Repúblika (PR) Francisco Guterres L...
1 2 3 727

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker