GMN TV Saude e Educação EE dalimak, PR husu autoridade saúde tau atensaun ba kuarentena obrigatóriu

EE dalimak, PR husu autoridade saúde tau atensaun ba kuarentena obrigatóriu

0 views

Prezidente Repúblika (PR), Francisco Guterres Lú Olo, hatete, autoridade saúde sira sulan ema mai husi rai-liur iha kuarentena tenke akompaña mós ho medida preventiva sira seluk, liu-liu rekomendasaun sira mai husi Organizasaun Saúde Mundial (OMS) no Ministériu Saúde (MS) hanesan uza maskára, fase liman bebeik ho sabaun no halo distansiamentu sosiál, nune’e bele  evita COVID-19 labele hadaet.

Hafoin dekreta Estadu Emerjénsia (EE) ba dalimak, iha Kinta (03-09), PR Lú Olo iha Sábadu (05-09), hato’o kedas nia mensajen ba povu Timor-Leste, atu matan moris neon nain.

“Tanba sá ita kontinua ho Estadu Emerjénsia (EE)? Tamba ida ne’e medida preventiva ida atu hasees-an husi moras COVID-19 hadaet ba komunidade husi sira ne’ebé tama mai husi rai sira seluk, liu-liu husi rai viziñu Indonezia no Austrália. Númeru kazu pozitivu konfirmadu sa’e liu tan iha ita nia nasaun viziñu. Loro-loron mosu tan kazu konfirmadu foun. Iha Austrália mate ona ema 600 resin. Mate ona iha Indonézia ema liu 7000, inklui iha Nusa Tenggara Timur (NTT), provínsia halo fronteira ho Timor-Leste. Nune’e, moras COVID-19 bele tama tan, iha momentu ne’ebé de’it, husi ema ne’ebé hakaat fronteira-rai, tasi, mai ho kareta ka la’o ain, aviaun ka ró”, tenik PR ne’e.

Xefe Estadu konsidera moras COVID-19 bele tama lalais liu mai Timor-Leste ho ema ne’ebé asintomátiku. Tamba ne’e importante ema sira ne’ebe tama iha kuarentena obrigatória tenki hetan kontrolu diak husi pesoal saúde, atu nune’e la husik vírus ne’e hada’et husi ema ba ema.

“Hotu-hotu ne’ebé tama mai husi dalan legal ka husi dalan ilegal, la hatudu kedas sinal katak bele iha moras COVID-19. Enkuantu hela iha kuarentena, balun hatudu sinál katak bele iha moras COVID-19. Pesoál saúde halo kedas teste. Bainhira rezultadu teste fó sai pozitivu ba ema ruma, pesoal saúde haketak no lori kedas ema ne’e ba fatin izolamentu Klínika Vera Cruz, hodi labele hada’et ba ema  seluk. Atu hasees moras tama komunidade, ne’ebé tama iha kuarentena tenke halo teste molok sai husi ne’ebá. Karik ema ruma pozitivu, sira ne’ebé tama mai hamutuk ho nia tenke hela tan loron 14 iha kuarentena. Ida ne’e mak prosedimentu loos hodi prevene no kontrola moras COVID-19”, deklara Lú Olo.

Xefe Estadu apelu mós ba sidadaun  hotu atu halo tuir medidas Estadu Emerjénsia (EE) ne’ebé Governu aprova ona no sei implementa. Além de ne’e, husu mós ba entidade responsábel sira atu fornese meius protesaun ba pesoal linã-oin ne’ebé preokupa ho sira nia servisu, tamba sira mak servisu hodi proteje ema hotu husi COVID-19 no tenki kontrola diak liu tan fronteira, aeroportu, portu, pontu entrada no fatin kuarentena sira.

Entretantu dau-daun ne’e, Timor-Leste iha kazu ativu ida no iha hela sentru izolamentu Vera Cruz. oct


Banner

Foto

Notisia Ikus

PM Taur husu sidadun hotu tenke kria paz durante kampaña eleitorál

January 17, 2022
Primeiru Ministru (PM) Taur Matan Ruak apela ba ...

Lú Olo Rekandidata–an ba Prezidente Repúblika

January 17, 2022
[caption id="attachment_58994" align="aligncenter"...

Eleisaun ba PR Sei Realiza iha Loron 19 Marsu

January 17, 2022
[caption id="attachment_58989" align="aligncenter"...

Ema na’in 10 hatudu prontidaun kandidata-an ba PR

January 16, 2022
[caption id="attachment_58967" align="aligncenter"...

Lere sei deklara ninia kandidatura ba PR iha Ainaro

January 15, 2022
Xefe Estadu Maiór Jenerál F-FDTL, Tenente Jene...
1 2 3 681

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker