Xefe Sentru Saúde Formosa (SSF), Jaime dos Reis Belo, informa, durante fulan Jullu, tinan ne’e, SSF rejista moras ispa 974, moras kulit 42, inklui moras diareia hamutuk 277.
“Durante ne’e moras ne’ebé mak ami rejistu iha sentru mak hanesan moras ispa, moras ispa ne’e kuaze tama iha sentru ne’e kada fulan sa’e hela de’it, no moras diareia, inklui mós moras kulit”, Xefe SSF hato’o asuntu ne’e iha ninia kna’ar fatin Bairo Formosa, Díli, Kuarta (09-09-2020).
Jaime esplika, moras ispa no moras kulit ne’e kuaze kona labarik sira ne’ebé halimar rai-rahun to’o ferik katuas sira ne’ebé hala’o aktividade iha liur, liu-liu sira ne’ebe fa’an sasan iha estrada ninin.
“Kauza husi moras ispa ne’e, tanba ita iha sidade Díli agora bailoro, motor no kareta ne’e sempre ba mai ne’e rai-rahun suar sira ne’e mak sempre halo sira moras, ne’ebé moras ne’e sempre aas iha sentru saúde ida ne’e“, tenik nia.
Atu prevene moras ne’e labele kona labarik ou ema boot, Xefe SSF ne’e husu ba komunidade sira bainhira sai ba iha fatin públiku ou la’o ba hala’o atividade ruma tenke uza máskara no komunidade sira mós tenke iha konsénsia atu hadia uma oin.
“Atu prevene, sé bele agora dau-daun moras COVID-19 mós la’o hela, hato’o ba iha populasaun sira karik sai tau mascara, depois evita rai-rahun suar, sira ne’ebé mak mai hasoru ita, depois hadia ita-nia uma sorin, hadia uma laran, atu nune’e moras labele kona ita”, dehan Jaime.
Entretantu dadus jerál husi fulan Janeiru to’o Agostu, tinan ne’e, totál moras ispa hamutuk 10119, moras diareia 1736, moras kulit 865, pneumonia 262, te-been ho ra’an 24, dermatitis 2033 no scabies 203. eni
