Polísia Nasionál Timor-Leste (PNTL) kaptura estudante Aliansa Universitáriu Timor-Leste (AUTL) hamutuk na’in 15, tanba ba manifestasaun iha loos edifísiu Ministériu Ensinu Superiór Siénsia no Kultura (MESSK) ninian.
Iha Kuarta (09/09/20) mais ou menus tuku tolu ho balun, oras Timor-Leste, estudante AUTL hamutuk na’in 15, ba hala’o manifestasaun iha edifísiu MESSK Kolmera Díli, hodi ezije sira-nia direitu ba Governu atu tau matan ba sira.
Tuir informasaun husi Polísia katak, ho asaun ne’ebé mak estudante sira hala’o, hodi la kumpre ona konkordansia entre estudante AUTL ne’ebé mak antes ne’e, hala’o ona iha Kuartel Jerál PNTL katak, konsentrasaun massa AUTL sei konsentra de’it iha área Resintu Muzeu Rezisténsia nia oin, maibé estudante sira ba hala’o fali iha edifisiu MESSK, iha Área Kolmera.
Tanba ne’e, PNTL sira halo kapturasaun, hodi transporta ba iha Kuartel PNTL Díli, hodi hasai sira ninia identidade kompletu no posibilidade estudante sira sei detein durante oras hitu nulu resin rua, tanba estudante sira la obedese ba akorrdu ne’ebé mak hala’o ona.
Entre estudante 15 ne’e, feto na’in rua no mane sanulu resin tolu. Asaun ne’ebé estudante sira halo, hodi kontinua ezije ba Governu, liu husi MESSK atu halakon polítika diskriminasaun ne’ebé mak hasoru estudante rai- laran, atu nune’e Governu bele responsabiliza fila-fali estudante rai-laran nia lamentasaun liu-liu iha sira ninia propinas semestre par iha tinan ida ne’e. avi
