Ekipa konjunta Unidade Patrullamentu Fronteira (UPF) no FALINTIL Forsa Defeza Timor-Leste (F-FDTL) kaptura membru Persaudaraan Setia Hati Terate (PSHT) na’in 37, iha fronteira terrestre tanba tama ilegalmente, iha ne’ebé iha posibilidade bo’ot membru Grupu Arte Marsiál (GAM) Timor-oan sira ne’e bele lori moras a’at COVID-19 husi Repúblika Indonézia (RI) tama mai Timor-Leste (TL).
Maske dadauk ne’e, Timor-Leste dekreta hela Estadu Emerjénsia (EE), bandu ema atu labele hakat liu liña fronteira ba Timor Osidental, Indonézia, maibé Timor-Oan sira nafatin tama ho ilegalmente ba Atambua-Indonézia.
Tamba ne’e, iha semana ida ne’e, servisu konjuntaUPF–F-FDTL konsege kaptura ema na’in 37 deskonfia membru PSHT, ne’ebé ba sae sintu iha Atambua-Indonézia.
“Atu informa de’it katak, iha hahú iha loron 4, fulan Setembru too loron 7, ekipa konjuntu husi UPF, F-FDTL no COE, kaptura sidadaun Timor sira ne’ebé mak ultrapasa fronteira hodi ba sae sabuk iha Indonézia hamutuk sira na’in 37, agora dadauk sidadaun sira ne’e detein ona iha kuarentena Batugade. Ema sira ne’e husi GAM hanesan ita hotu hatene, sira ba halo izame sae sabuk iha Indonézia sira fila mai mak forsa konjuntu kaptura sira. Ema 37 husi PSHT”, esplika Porta-Voz PNTL Superintendente Xefe Arnaldo Araújo, Kuarta (09/09/2020), liu husi konferénsia imprénsa iha Kuartel Jerál PNTL, Caikoli-Díli.
Komandante ne’e mós kontinua apela ba komunidade sira, atu labele tama sai ilegal iha liña fronteira, atu nune’e bele prevene COVID-19.
Antes ne’e iha Segunda (7/9/2020), PNTL kaptura membru PSHT na’in neen (6) iha sira nia uma iha Bairo Pité, hafoin ba sa’e sintu iha Atambua, Indonézia.
Ema na’in neen (6) ne’e ho inisiál PV, MS, QN, GL, AQ no IN, ne’ebé kaptura iha Segunda (07/09/20), mais ou menus tuku 12 meiudia oras Timor-Leste. avi
