Relatóriu ne’ebé relata husi Sentru Integradu Jestaun Krize (SIJK), iha Tersa (31/08) hatudu, kazu detetadu foun ba teritóriu tomak 167, ba Munisípiu Díli rejista kazu pozitivu 119. Antes ne’e iha loron (29/08) SIJK relata, rejista kazu pozitivu iha teritoriu tomak 166 no ba Munisípiu Díli kazu pozitivu foun 119.
Dadus ne’ebé GMN asesa hosi SIJK, hafoin impelementa Konfinamentu Domisiliáriu Jerál (KDJ), númeru pozitivu COVID-19, hahú tun husi loron 27, fulan Agostu ba teritóriu tomak rejista 357, Munisípiu Díli kazu pozitivu 228, no 129 husi Munisípiu sira seluk.
Iha loron 28, Agostu ba teritórriu tomak 276 ba Munisípiu Díli 197, no 79 husi Munisípiu sira seluk. Iha 29, Agostu rejista tan kazu pozitivu foun ba teritórriu tomak 116 no ba Munisípiu Díli 119 no Munisípiu seluk 47.
No iha loron 30, fulan Agostu kazu pozitivu tun ba 113 ba teritórriu tomak, ba Munisípiu Díli 66 kazu foun, no Munisípiu seluk 47, maibé iha loron 31 Agostu kazu pozitivu COVID-19 sae fila fali ba 167 ba terotórriu tomak, ba Munisípiu Díli sae ba 119, kazu pozitivu foun, dadus ne’e kuaze hanesan ho dadus loron 29 Agostu nian.
Maske númeru kazu positivu aumenta iha loron 31 Agostu, maibé iha semana ida ikus ne’e, hahú loron 24 Agostu to’o loron 30 Agostu hatudu iha redusaun ba númeru pozitivu iha teritórriu tomak, inklui Munisípiu Díli.
Koordenador Forsa Tarefa Prevensaun no Mitigasaun Surtu Covid-19, Rui Maria de Araújo hatete bazeia ba estimasaun previlensia epidemolójika provavél katak iha ema besik 100.000 iha Díli mak agora dadaun infetadu ho COVID-19.
Estimasaun ba prevalensia durante semana kotuk, teste iha Laboratóriu HNGV no Laboratoriu Nasional Saúde 29.3% ka (1,777/6,061), mak pozitivu, kompara ho 24.7% iha períodu relatórriu anterior.
Prevalensia COVID-19 nian iha Dili ne’e, bele estimadu, bazeia ba proporsaun husi ema sira ne’ebé mak teste pozitivu ba COVID-19, bainhira sira halo teste antes atu viajem sai husi Serka Sanitária.
Iha loron 7, komesa husi loron 22 to’o loron 28 agostu ne’e, iha total ema nain 1,551 mak halo ona teste ba intensaun ida ne’e, entre 456 ne’e (29.4%) mak hetan pozitivu.
Husi ida ne’e, bele uza hodi halo kalkulasaun ba prevalensia, no kalkulasaun ida ba intervalu konfiansa nian 95%, hatudu katak COVID-19 nia prevalensia atuál iha Dili, ne’e mak entre 27.2% no 31.7%.
Atualizasaun ba vasinasaun mais ou menus vasina kontra COVID-19 nia doze hamutuk 55,000 mak administra ona iha semana kotuk.
To’o iha loron 31 Agostu ne’e, vasina COVID-19 nia doze dahuluk hamutuk 387,597 mak administra ona, iha Timor-Leste, reprezenta 51.3% husi populasaunne’ebé elejivel ho idade husi tinan 18 ba leten.
No ema hamutuk 195, 400 mak simu ona doze daruak vasina COVID-19 nian, iha Timor-Leste, reprezenta 26.2% husi populasaunsira ne’ebé mak elejivel ho idade tinan 18 ba leten.
To’o oras ne’e, TL rejista kazu komulativu konfirmadu COVID-19, liu 16.000, kazu rekoperadu besik 12.000, kazu ativu 4000 resin, kazu mate ne’en 67.GMN
