Profisionál saúde ne’ebé destaka iha pontu entrada Kasanafar, Manleuana, Postu Administrativu Dom Aleixo, Munisípiu Díli hatete, sidadaun ne’ebé vasina kompleta bele la’o lívre.
Enfremeiru Jacinto Soares afirma, implementasaun iha terrenu, profesionál saúde sira aplika mak, vasina dala-rua atu halo movimentu tenke tuir lai teste screening, bainhira rezultadu 36 grau selsiu ba kraik bele lívre.
“Sira balu vasina kompleta ona, ami sei halo teste screening, karik nia temperatura 38 ba leten ami tenke halo swab, maibé karik sira hetan temperatura 36 grau selsius ba karaik, livre ba sira atu halo viajen, foti surat viajen nian, sira bele ba múnisipiu sira no fatin sira ne’ebé sira nia hakarak ba,” informa Enfremeiru ne’e, ba GMN iha pontu entrada Kasanafar, Manleu, Sábadu (04/09).
No sidadaun ne’ebé idade 18 ba leten vasina doze dahuluk mós tenke iha rejultadu teste swab rejultadu negativu, nune’e mós ba labarik kiik idade 17 ba kraik, foin halo movimentu.
“Karik sira ne’ebé vasina foin dala ida, entaun ami halo teste screening, direita, ami swab kedan, ne’e regra mak hanesan ne’e duni, ba labarik sira ne’e tinan 16-17 ba kraik tanba sira seidauk bele hetan vasina ida ne’e, entaun direita ami halo rapi test ka swab ba sira,” tenik nia.
Antes ne’e Ministra Saúde (MS), Odete Maria Freitas Belo deklara katak, sidadaun ne’ebé vasina kompleta ona atu halo movimentu tenke tuir teste rastreiu.
Konsellu Ministru mós aplika ona medida Konfinametu Domisiliáriu Jerál (KDJ) ba populasaun ne’ebé hela iha Díli, inklui sidadaun ne’ebé vasina kompleta ona, atu labele halo movimentu ba Munisípiu.Ags
