Prezidente komisaun F ne’ebé trata asuntu saúde iha Parlamentu Nasionál (PN), Noe da Silva, husu ba sidadaun sira atu kontinua kumpre regra husi Organizasaun Mundiál Saúde (OMS), hodi prevene Corona Virus Disease 2019 (COVID-19).
“Nasaun nasaun viziñu sira kontinua rejista kazu COVID-19 aas, tanba Estadu deside estende nafatin Estadu Emerjénsia (EE), maibé sidadaun sira la kumpre ona regra husi OMS hodi mantein distansia sosiál, uza máskara no fase-liman ho sabaun. Foin la-lais ita aprova ona EE medida Estadu no Governu prevé mak Timor-Oan tenke iha nafatin distansiamentu sosiál tenke halo tuir regulamentu OMS hanesan uza máskara fase-liman no distansia sosiál, maibé ita haree realidade sidadaun sira-nia moris diariamente ita la kumpre regra OMS 100%. Tanba ne’e husu komprensaun sidadaun hotu tenke kumpre regra ne’ebé OMS”, Prezidente komisaun F ne’e ba GMN iha PN, Tersa (06-10-2020).
Nia informa, COVID-19 ne’e la’ós hanesan moras sira seluk, ne’e moras ida ne’ebé perigozu tebes ba ema nia vida, nune’e sidadaun sira tenke kumpre regra husi OMS no Governu tenke muda lei sistema saúde, hodi labele estende tan EE.
“Pandémia COVID-19 moras la’ós hanesan bai-bain, tanba ne’e tenke tuir OMS nia hakarak. Ha’u hanoin ba oin hafoin debate Orsamentu Jerál Estadu (OJE) PN tenke haree ona oinsa mak labele estende EE, kada fulan ita halo renovasaun hela de’it, tenke muda ona lei sistema saúde ida ne’e para lalika fó tan biban halo estensaun EE fulan-fulan, ho lei refere sistema saúde ne’e bele garante implementasaun iha baze”, tenik Noe.
Hatán ba kestaun ne’e, Ministra Saúde, Odete Maria Freitas Belo, promete, sei haree ba fatin públiku hanesan loja sira atu kontinua tau bee no sabaun, nune’e molok sidadaun atu sosa sasan tenke fase-liman, hodi prevene transmisaun COVID-19.
“Imi hamriik hanesan ne’e tuir loloos ha’u iha obrigasaun dehan imi labele iha no tenke uza máskara, polítika mak tenke uza máskara atu ha’u nia moras labele da’et ba imi. Maske implementasuan EE faze primeiru ho segunda diferénsia ho halo renovasaun EE tuir malu, tanba sidasaun sira la kumpre ona distansia sosiál, la uza mascara no fase-liman ho sabaun. Tanba ne’e Ministériu Saúde (MS) iha ona polítika atu kontinua haree fali ba iha fatin públiku sira tenke tau bee no sabaun, nune’e sidadaun sira bele fase-liman. Ami hakarak haree fali fatin públiku sira hanesan loja no eskola sira tenke kontinua tau bee no sabaun, nune’e estudante sira bele fase-liman, hodi kumpre regra husi OMS”, tenik Governante ne’e.
Entretantu iha loron 28, fulan Jullu, tinan ne’e, liu husi komunikadu imprensa ne’ebé fó sai husi média Palásiu Prezidensiál katak, Prezidente Repúblika (PR) veta dekretu lei rejime jurídiku ba vijilánsia epidemolójika no vijilánsia sanitaria husi Governu kona-bá atu hatur regra oinsa proteje no promove saúde públika, tanba la tuir konstituisaun RDTL no limita direitu liberdade sidadaun sira nian. ety
