Diretor Eskola Vokasional Fatumaka, Amu Locatelli, Tersa (20/11/18), hasoru malu ho Primeiru Ministru Taur Matan Ruak hodi hato’o nia preokupasaun liu- liu ho futuru juventude Timor Leste, nune’e Amu Locatelli harii tan sentru formasaun ida iha Fatumaka.
Amu Locatelli hateten, nia harii tan sentru formasaun ida iha Fatumaka, maibé nia laiha kbi’it atu selu formador sira. Tanba ne’e, nia hasoru malu ho Xefi Governu hodi husu Governu atu fó subsidiu ba formador sira ne’ebé hanorin iha sentru formasaun ne’e.
Reprezentante profesores Fatumaka, Venancio Freitas, hateten, dadauk ne’e Padre Locatelli harii tan eskola vokasional ida iha Fatumaka hodi fó formasaun ba joven sira.
“Amu Locatelli preokupa liu ba joven sira ne’ebé la akaba sira nia eskola, entaun Amu harii tan uma formasaun ida iha Fatumaka, tanba ne’e mak nia mai husu Primeiru Ministru, Taur Matan Ruak, atu oinsa bele ajuda hodi fó subsidiu kona ba mestri sira iha formasaun ne’e,” relata Venancio Freitas ba jornalista sira iha Palásiu Governu.
Nia haktuir, kursu ne’ebé mak Amu Locatelli loke tan iha Fatumaka ne’e mak hanesan, kursu karpintária, kursu eletrisidade, kursu mekaniku otomotivu kursu soldadura no kursu kanalizasaun. Kursu ba área hirak ne’e nia durasaun tinan ida.
Tanba ne’e, Amu Locatelli mai hasoru malu ho PM Taur Matan Ruak hodi husu Governu atu tau matan ba mestri sira ne’ebé mak hanorin iha kursu hirak ne’e, tanba Amu Locatelli laiha forsa ekonomia atu selu mestri sira ne’ebé mak hanorin iha formasaun ne’e.
Iha okaziaun ne’e mós, Amu Locatelli husi Xefi Governu atu marka tempu ida hodi hakat ba Fatumaka atu halo inaugurasaun ba formasaun hirak ne’e.
Venancio dehan, professor sira ne’ebé mak atu hanorin iha sentru formasaun ne’e, hamutuk ema nain sanulu, ho espesialidade ne’ebé lahanesan.
Iha sorumutu ne’e, Xefi Governu hato’o ba Amu Locatelli katak, dadauk ne’e Governu preokupa hela ho problema nasaun nian ne’ebé mak iha ligasaun ho povu Timor Leste tomak nia moris.
Maibé PM Taur dehan, nia kontenti tebes ho esforsu Amu Locatelli nian ne’ebé harii ona uma formasaun ida tan ba joven sira, no Governu sei haree hodi konsidera asuntu ne’e.cos
