Ministériu Óbras Públikas (MOP), iha Sesta, loron 15, fulan ne’e, lori tékniku 34 husi MOP, Ajensia Dezenvolvimentu Nasional (AND), Universidade Nasional Timor Lorosa’e (UNTL), Asosiasaun Enjiñaria Timor no Câmara Comerçio Indústria Timor-Leste (CCI-TL), halo inspesaun no supervizaun ba ponte iha Bee-Hedan, munisípiu Manatuto.
Vizita ba ponte bee-Hedan ne’e, hanesan aktividade prátika, hodi konklui pakote formasaun iha área konstrusaun, manutensaun no inspesaun ba ponte sira.
“Formasaun ba tékniku sira ne’e importante teb-tebes atu garante kualidade projetu sira, ohin ami mai vizita hodi haree ponte sira, treinamentu durante semana ida ne’e ligadu ba ponte ni’an, oinsa halo monitorizasaun inspesaun ba ponte, konstrusaun ponte sira ne’e tuir duni Bill of Quantity (BoQ) ka la’e, ohin ami mai halo vizita atu haree realidade ne’ebé akontese iha terenu”, formandu ou partisipante, atual Diretór Peskiza Laboratóriu Nasionál Óbras Públika, Saturninho Gomes ba GMN, iha Manatuto, Sesta (15-11-2019).
Nia hatutan, normalmente iha dezeñu tenki iha espesifikasaun, selesaun material uza ba konstrusaun tenki halo kalkulasaun ba volume servisu, hanesan ponte tuir nia padraun ne’ebé estabelese.
Husi sorin seluk, tékniku, Junito da Costa Ribeiro, hateten, formasaun ne’e haree liu ba sistema jestaun óbra de arte, ne’ebé koalia kona-bá atu halo inspesaun, hodi halo manutensaun ka reparasaun.
“Iha Timor-Leste foin mak hahú ho dezenvolvimentu, ita presiza tuir formsaun sira hanesan ne’e, ba oin ita bele kria inspesaun hodi halo manutensaun no reparasaun, ami hirak ne’ebé partisipa iha formasaun ne’e mai husi área tékniku enjiñaria sivíl, iha ona koñesementu, nune’e ho formasaun ida ne’e ami bele hatene loloos objetivu inspesaun manutensaun ho reparasaun nian”, tenik Junito.
Formandu 34 ne’e tuir formasaun teoria iha área tékniku hanesan sistema jestaun óbra no arte durante semana ida iha otél JL VILLA, Aimutin-Díli no formasaun refere oferese husi formadór sira husi nasaun Portugal. ety
