FOTO: Facebook
Vise Ministru Edukasaun Juventude no Desportu (MEJD), António Guterres, rekoñese, MEJD hasoru dezafiu barak durante iha pandemia Corona Virus Disease 2019 (COVID-19).
Governante ne’e klarifika, dezafiu ne’ebe MEJD hasoru iha tempu pandemia COVID-19 mak labele kontinua formasaun ba profesór sira no prosesu ensinu aprendijazen iha eskola sira mós labele la’o ho normal.
Vise Ministru Edukasaun Juventude no Desportu, António Guterres, hato’o lia ne’e iha ninia diskursu durante partisipa iha semináriu sientífiku kursu baisarelatu Universidade Nasionál Timor Lorosa’e (UNTL), iha salaun Institutu Nasionál Formasaun Dosente Profisionál Edukasaun (INFORDEPE), Balide-Díli, Tersa (10/11/2020).
“Ita la nega katak, iha mós dezafiu barak mak ita hasoru, liu-liu iha tempu pandemia COVID-19 buat barak mak paradu hanesan formasaun kontinua ba profesór sira, ita bo’ot sira hatene ita-nia atividade aprendijazen labele la’o hanesan bai-bain”, haktuir António.
Maibé, Governante ne’e akresenta, VIII Governu nafatin iha komprimísu atu tau nafatin atensaun ba profesór sira, liu husi formasaun hodi hasae liu tan kualidade edukasaun profesór sira, tanba sira mak xave transformadór iha sosiedade.
“Ita hein katak, husi tempu ba tempu, liu-liu iha situasaun ne’ebé ita-nia rain hasoru hela bele fó biban ba Ministériu Edukasaun kontinua hakas-an nafatin atu mellora liu tan formasaun ba ita-nia profesór sira, nune’e bele hasa’e liu tan kualidade edukasaun profesór sira atu sai edukadór di’ak, hodi serví ita nia-oan sira”, tenik Governante ne’e.
Enkuantu INFORDEPE no UNTL oferese ona formasaun akadémika ba profesór hamutuk 2000 no sei kontinua ba baisarelatu.
Programa formasaun ba profesór husi pré-eskolar to’o ensinu sekundáriu iha teritoriu Timor laran tomak ne’e realiza ona dezde tinan 2018. ías
