Halakon lian Materna, PM Rui: Lakohi antisipa tanba prosesu la’o hela

Primeiru Ministru (PM), Rui Maria de Araújo hatete, lakohi antisipa uluk ba opiniaun públiku balun ne’ebé krítika Governu atu halakon hanoin lian maternal iha eskolas ensinu báziku, tanba Rui Araújo esplika katak, prosesu ne’e sei la’o hela no pilotu ida atu fasilita labarik sira hatene hakerek no lee lalais.

“Ha’u lakohi antisipa maibé, ha’u hakarak hatete katak senhor Ministru Edukasaun organiza konferensia internasional ne’e, loloos ne’e Governu nia kompeténsia, maibé la konvida Xefi Governu ba iha ne’ebá, la iha buat ida. Mas prontu Ministru Edukasaun halo tiha ona aprezentasaun ida konaba avaliasaun ensinu utilizasaun lian materna ba iha ensinu, hodi nune’e labarik sira bele aprende ABC ho 123 lalais no di’ak liu. La’os hanorin lian materna, buat ne’e la hanesan, pilotu ne’ebé halo ne’e uza lian materna atu labarik sira bele aprende lee no hakerek lalais liu, hodi depois hahú terseiru ano eskolaridade, sira tama ba  bele aprende tan buat seluk,” hateten PM Rui Araújo ba Jornalista sira, iha Suku Tibar, Postu Administrativu Bazartete, Munisípiu Liquiça, hodi responde ba jornalista sira nia perguntas konaba opiniaun públiku balun ne’ebé husu ba Ministériu Edukasaun atu halakon no hapara hanorin lian materna iha eskolas ensinu báziku sira.

Xefi Governu ne’e haklaken katak, Ministru Edukasaun rasik mós esplika katak, lian materna ne’e programa pilotu ida. No programa ne’e halo tiha ona avaliasaun agora Ministru Edukasaun hetan instrusaun husi Konsellu Ministru hodi atu halo analiza ba rezultadu avaliasaun pilotu hodi nune’e rekomenda ba Governu, para oinsa atu halo polítika ba oin ninian.

Antes ne’e Prezidenti Repúblika, Taur Matan Ruak wainhira partisipa iha konferensia nasional ne’ebé organiza husi Ministériu Edekuasaun iha salaun Delta Nova Comoro, Díli foin lalais ne’e, halo krítika ida hodi husu ba Governu liu husi Ministériu Edukasaun atu halakon ka labele hanorin tan lian materna iha eskola sira.des