DIT gradua finalista 495

Estudante finalista Dili Institute of Technology (DIT) hamutuk 495 gradua tan fali ona, tanba ne’e ho esperansa bele kontribui ba dezenvolvimentu nasaun.

“Husu ba graduadu sira simu dezafiu ne’ebe mak sei mosu iha futuru, liu-liu mak kompetisaun iha kampu de traballu, tanba ne’e husu ba finalista sira tenke prepara an hodi hasoru dezafiu. Husi serimonia solene ne’e foin mak passu primeiru, maibe komesa aban ba oin imi sei infrenta dezafiu barak liu tan liu liu kompetisaun ne’ebe maka’as tebes,” haklaken reitor DIT, Alvaro Menezes Amaral, iha nia deskursu ba serimonia graduasaun estudante finalista DIT, Kuarta-feira (29/11/2017) iha kampus DIT Manleuana-Dilí.

Reitor husu ba graduadu DIT, atu uza didiak matenek ne’ebe mak durante ne’e hetan iha DIT hodi aplika iha moris para bele hadia vida moris iha futuru.

“Graduadu sira imi iha matenek iha, imi nia ulun, imi iha ain iha imi sapatu laran hodi halo transformasaun ba ita nia familia, kolega no ikus liu transforma ita nia nasaun,” afirma nia.

DIT iha Fakuldade 4  mak hanesan, Teknik Civil, Engenaria Makanika, Engenaria Petroliferu no Turismu, ho departamentu mak hanesan, engenaria civil, siensia komputador, engenaria petroliferu, gestaun petroliferu, finansa manejementu, hotelaria no turismu. Aes