GMN-Escola Ruy Cinatti lansa programa hanorin lingua Portuguesa

Kooperasaun Grupo Média Nacional (GMN) ho Escola Portuguesa de Dili, Ruy Cinatti, Kuarta (28 / 02/2018), lansa programa foun ne’ebé publika husi kanal Televizaun Grupo Media Nacional (GMN), ho objetivu atu divulga no hanorin Timor oan sira kona-ba Lingua Portuguesa.

“Kumpri lingua ofisial Timor nian iha  rua Tetum ho Portugues , ne’ebé konsagra ona iha konsituisaun,  tamba ne’e ita hotu  hatene konaba kanal ida  no Televizaun

Nasional iha Timor, ho programa lingua portuguesa ne’e, ita tenta iha konteudu Portugués, liu husi novela sira ne’ebé ita sosa husi Portugal, animasaun, buat balun no mos fo formasaun kona-ba  lingua liu husi ita-nia kanal,” dehan  Prezidenti Konsellu Administrasaun Grupo Media Nacional (GMN), Jorge Serrano, ba Jornalista GMN  iha Escola Portuguesa Ruy Cinatti.

Prezidenti Konsellu Administrasaun GMN ne’e dehan, ho inistiva GMN nian mak Prezidenti  halo konversa ho Embaixador Portugal sesante  hetan resposta diak tebes hodi hala’o reuniaun ho Eskola Portuguesa Ruy Cinatti, hosi implementa programa ida ne’e atu oinsa ema hotu aprende lian portugués liu husi televizaun.

“Ha’u hanoin katak, aula ne’e hanesan aula badak, tamba se aula naruk entaun bele membosankan, ho aula badak nune’e durante minutu 10 to’o 15 lor loron, hanoin katak publiku sira ne’ebé hakarak aprende Portugués ka atu koalia Portugués ne’ebé mak lolos no Portugués ida ne’ebé mak diak. tamba ha’u hanoin katak problema bo’ot ne’ebé ita infrenta  mak problema Lingua, maske ita-nia Konstituisaun konsagra ona lingua Portuguesa  hanesan lingua ofisial, maibe ita haree agora la’o la másimu, atraves ho kanal GMN ita buka promove lingua Portuguesa ba ema sira ne’ebé presija hakarak aprende lingua portuguesa,”esplika Prezidente Konsellu Administrasaun GMN ne’e.

Iha fatin hanesan, Diretor Escola Portuguesa Ruy Cinatti, Acaçio de Brito, akresenta,  programa ne’e atu lori Timor oan sira bele aprende ho forma simples saida mak lian  Portugues, tamba sira  hatene  katak lian portugues nu’udar lian ne’ebé difisil  ba Timor oan sira.

“Ami hakarak halo mak ba ema sira ne’ebé koalia ka falla sira domina iha lian Portugués, no importante tebes ba Timor, Portugal no mundu, tamba Portugués hanesan lian dáhat iha mundu ho ema sira ne’ebé koalia lian barak tebes, no importante ba Timor oan atu koalia lian ne’e lor-loron,”informa Diretor Escola Ruy Cinatti ne’e.

Enterantu Vise Ministra Edukasaun, Lurdes Bessá, apresia ho lansamentu programa GMN nian ne’e, tamba sei to’o ba familia lobun ida iha rai laran, apresia mos partisipasaun eskola Portuguesa ne’ebé insina tomak ho lian Portugués, tamba lian Portugués hanesan lian ofisial Timor nian hamutuk ho Tetum.

“Importante tebes, uza forma  hotu ne’ebé ita iha, importante liu husi komunikasaun sosial hodi bele hato’o buat ruma ba ita-nia komunidade tomak iha rai laran, programa ne’ebé ami observa husi lansamentu  ne’e diak tebes ho profesor husi eskola refere mak lori, la’os atu hanorin deit, maibe atu ajuda lor- loron ita bele prátika koalia lian Portugués,”subliña Vise Ministra Edukasaun ne’e.Oly