Ispa ho Diareia maka’as iha Viqueque

Moras Ispa ho Diareia afeta maka’as komunidade sira iha Viqueque.

Tuir dadus ne’ebe mak informa husi Direktur Servisu Saude Municipiu Viqueque, Francisco de Carvalho, katak, iha tempu udan no rai bokon ne’e, maioria komunidade ne’ebe horik iha Viqeuque afeta moras Ispoa ho Diareia.

“Normalmente iha centru saude Viqueque moras ispa ho diareia maka domina, hahu husi Jeneiro to’o agora, kona ba ispa ninia impaktu husi mudansa klimatika ne’ebe mosu udan para derepenti depois rai rahun sa’e fila fali,” hateten Francisco de Carvalho ba GMN iha Municipiu Viqueque, Kinta (22/03/2018).

Atu prevene moras ne’e, profesionais saude sira sempre apela ba komunidade hotu atu la’o iha dalan tenke uja maskra atu nune’e bele limita transmisaun moras ispa.

“Kona ba aimoruk sufisiente, iha tinan 2017 husi total 165 item ne’ebe tama iha municipiu, ami iha 7% deit maka menus, maibe 7% menus ne’e ami bele taka hodi orsamentu jeral do Estado tinan 2017 nian, agora iha tinan 2018 iha fulan Janeiro iha mos 7%, tuir relatorio ne’ebe ami halo, lolos ami bele kobre, mais ho ejekusaun orsamentu doudesimu fo impaktu mai ami atu kompleta medikamentus sira ne’ebe sei menus, maibe kona ba aimoruk sufisiente, tanba iha semana kotuk SAMES foin haruka tan aimoruk mai. Aimoruk hirak ne’e maka hanesan, paracetamol, amoxilin no mos aimoruk seluk tan,” dehan Francisco de Carvalho.

 Saude Municipiu Viqueque ninia difikuldade boot maka wainhira atu halo transferensia moras ba Hospital referal Baucau, li-liu inan isin rua ho komplikasaun.

“Ami infrenta difikuldade kona ba transferensia moras, tanba ami nia kondisaun geografika la favorese para atu halo transferensia moras urjenti iha tempu loron sei diak, tanba aviaun bele mai, mais kalan kondisaun aeroportu la favorese,” dehan nia.

Municipiu Viqueque iha postu saude 45, no centru saude 5, doutor nain 55, profesionais hamutuk nain 300. mia