Defisiente Teresa dos Santos, fulan 8 ona la simu subsidiu

Maske governu iha komitmentu atu fo subsidiu ba ema ho defisiensia sira iha teritorio tomak, maibé subsidiu ne’e seidauk to’o ba defisiensia hotu-hotu.

Kazu ne’e mak akontese ba Teresa dos Santos, ne’ebe  fulan 8 ona la simu  subsidiu.

Realidade ida ne’e mak akontese ba Teresa dos Santos (36), ne’ebe hela iha Aldeia Waniria , Suku Eukisi , Postu Administrativu Lautém , Munisipiu Lautém.

Fou-foun, Teresa dos Santos, moris mai ho kondisaun normal, maibé wainhira nia idade to’o ona tinan tolu (3), nia sofre moras ida, ne’ebe halo Teresa, defisensia liman ho ain, ne’ebe halo nia tenke latan deit iha fatin to’o agora.

Alende liman ain kleuk Teresa dos Santos, mós la hatene koalia hanesan ho ema normal sira seluk.

Iha primeiru semana fulan Abril, Teresa dos Santos, hetan vizita husi Vice Ministru Saude , Luis Lobato.

Iha vizita ne’e , Vice Ministru Saude koko rasik Teresa, nia tensaun no telefone direitamente  ba  Ministra  Solidaridade  Sosial , hodi  husu kona ba direitu subsidiu ba Teresa nian.

Depois telefone , Vice Ministru Saude husu ba lideransa komunitaria no autoridade lokal sira atu esforsu an buka  meius  hodi hafasil ema ho defisiensia atu asesu ba subsidiu husi Governu.

Lideransa Komunitaria Eukise  promete sei buka meius no koordena ho BNCTL atu hafasil prosesu pagamentu subsidiu ba Teresa dos Santos.

Durante ne’e , Teresa hela ho nia maun Martinho  dos  Santos, ne’ebe  sempre hein nia kalan loron  atu ajuda fo han , fo haris  to’o ba soe foer boot.

Defisiente  Teresa  dos  Santos, moris  iha  Aldeia  Vaniria,  Suku  Equise,  Postu  Administrativu  Lautém, Munisipiu  Lautém  iha  tinan  1982. Oan  husi  Rita  Soares  no  Maucau ho nia maun alin  nain  5.Almeida  dos  Santos.