Joaquim Couto: Lian Português ponte Ligasaun TL-Portugal

Prezidente Munisipiu Santo Tirso Joaquim Couto, hateten, lian Português  sai nu’udar ponte boot atu Liga Timor-Leste ho Portugal, hodi hametin relasaun bilateral.

Joaquim Couto, hato’o asuntu ne’e hafoin vizita Escola Portuguesa Ruy Cinatti , Balide-Díli, Tersa-feira (03-04/2018).

Durante estadia iha Timor-Leste Prezidente Munisipiu Santo Tirso Joaquim Couto  hala’o vizita ba Escola Portuguesa  Dili  Ruy Cinatti  hodi haree diretamente prosesu no progressu dezenvolvimentu Língua Portuguesa iha eskola nee .

Nia konsidera, edukasaun importante tebes liuliu Língua Portuguesa hanesan ponte bo’ot neebe liga nasaun rua.

Iha vizita nee akompanha husi Embaixador Portugal iha Timor, José Pedro Machado Vieira, Diretor Escola Portuguesa Acácio de Brito no profesor sira.

Prezidente Munisipiu Santo Tirso Joaquim Couto, ho nia komitiva  hala’o vizita ba Escola Portuguesa Ruy Cinatti, simu husi diretor Acácio de Brito.

“Lian maka halo ligasaun husi timoroan ho malae Portugal sira, maibé iha mos buat barak iha pasadu no ohin loron ne’ebé liga ita hotu, no iha interese hamutuk husi autoridade sira iha nasaun rua ne’e ’’ dehan Couto.

Antes nee mos  Prezidente Munisipiu Santo Tirso Joaquim Couto  hala’o vizita ba suku Memo Munisipiu Maliana hodi fo apoiu ba misaun Irmãs Reparadoras de Nossa Senhora Fátima ho material escolar inklui osan euro rihun sanulu.

Joaquim Couto promete sei kontinua ajuda misaun Irmãs Reparadoras de Nossa Senhora de Fátima ho sira nia servisu iha suku Memo atu atende  labarik no joven sira.

Alende ne’e nia mos iha ona kontatu ho Prezidente Autoridade Munisipiu Bobonaro Zeferino Soares dos Santos  hodi mantein relasaun diak iha sidade rua ne’e  atu nune’e bele apoia iha nível oioin  hanesan edukasaun  ekonomia no seluk tan.

Viajen Prezidente Munisipiu Santo Tirso ba Timor  akontese hafoin kampaña “Santo Tirso Por Timor” ne’ebé realiza iha fulan Dezembru to’o

Janeiru ne’ebé populasaun sira husi munisipiu ne’e halao doasaun ba material escolar no seluk tan  hodi bele ajuda hari Biblioteka ida no Sentru Saude iha Memo-Maliana. LPS