Universidade Texas-EUA sei hala’o kooperasaun ho UNTL

Reitor Universidade Nasional Timor Lorosa’e (UNTL), Francisco Miguel Martins, hatete, Univerisdade Texas husi Estado Unidos América (EUA) sei hala’o kooperasaun ho UNTL. Maibe seidauk serteza kona-ba area prioriedade saida mak parte rua sei halo iha koopersaun ne’e.

Maske nune’e, UNTL ho Universidade Texas-EUA, iha ona intendimentu atu estabelese kooperasaun refere.

“Universidade Texas husi Estadus Unidus Amerika iha potensialidade atu koopera ho UNTL, ohin ita aprezenta ita-nia perfil Universidade nian, atu sira bele haree area saida mak sira presiza  kolabora ho ita, nune’e mos ita presiza saida mak atu kolabora ho sira,”dehan Reitor UNTL ne’e ba Jornalista sira hafoin remata enkontru ho  reprezentante Universidade Texas, Tersa (22/05/2018) iha  UNTL Dili.

Nia afirma, Dekanu husi Universidade Texas ne’e mai ho sira-nia estudante nian 6, atu halo peskiza iha Timor, nune’e aban bain rua sei halo kooperasaun diak liu tan.

“Iha Sesta mai  atu halo seminariu ida, professor no alunu sira sei partisipa depois sira mos husu tan atu halo interasaun ho sira-nia estudante atu halo  divertimentu oituan. Entaun objetivu fundamental mak atu aborda liu konaba prosperu de kooperasaun internasional ho Universidade Texas ne’e. Ita-nia odamatan nakloke  ba kooperasaun ho instituisaun Ensinu Superior Akademika iha ne’ebé deit,” dehan  Fransisco .

Fatin hanesan reprezentante no Associate Dean  for Academic Operation College  of Agriculture and Life Sciences Texas University A&M, Kim E. Dooly,  hatete, nia onradu bele hasoru malu ho reitor no akademiku UNTL nian, hodi bele aprende no koñese diak liu tan instituisaun UNTL.

“Ha’u senti previlejiu bele aprende no koñese diak liu tan imi-nia instituisaun, atu nune’e ita bele estabelese relasaun diak ida iha futuru, ne’ebé inklui transferensia estudante sira iha ita-nia fakuldade, no ami iha grupu estudante iha ne’e, ne’ebé mak hala’o estudu durante semana rua nia laran,”esklarese Kim.Oly