RUI MARIA FO XAMADA BA PESOAL SAÚDE IHA SENTRU SAÚDE VEMASSE

Ministru Saúde,  Rui  Maria  de Araujo fó xamada  atensaun  ba  mediku,  enfermeiru no parteira  sira  ne’ebe  hala’o  kna’ar  iha  sentru saúde  Vemasse, tamba  hala’o servisu  ladun diak.

“Ha’u  hatete ba imi, imi  ba  rejistu  domisiliariu  iha programa  saude na familia  iha suku sira ne’e  imi  lista  inan isin rua hira ona no isin rua hirak ne’e  imi buka tuir  ka lae  ,tamba  balun ho idade  tinan 19 to’o  20 ne’e  imi  buka  tuir, hanesan  professional de saude, tamba  buat ruma akontese ba inan ho oan ne’e oinsa”, duvida Ministru Saude  Rui Maria  de Araujo, wainhira  hala’o  vizita  ba  iha  sentru saúde  Vemasse foin lalais nee.

Governate nee mos cek  dadus  pesoal  saúde  sira nian  durante  hala’o vizita programa  saude  na familia  la klaru ,tamba  mediku  sira  lakohi  buka tuir  inan  isin rua  sira  ne’ebe  hakarak  partu iha  fasilidade  saúde.

Tuir Rui Maria de Araújo hatutan Ministeriu  Saúde  implementa  programa  ne’e  atu  hatun  númeru  inan isin rua partu  iha uma no  bele  hamenus  numeru  mortalidade  inan ho oan.

Ministru senior nee dehan  nu’udar  profesional  de saúde  ida  mak  la  konsege  salva  inan  ho oan  hodi  hetan  dezastre  signifika  katak,  profisaun  ne’ebe  kna’ar nain  saúde  sira hala’o  la ho susesu.

Rui  Maria  apela  ba  pesoal saude  hotu  atu  labele  tur  hodi hein de’it moras, maibe  tenki  saúde  sira mak  buka  ema  hodi  fo asistensia  saúde.

“Imi hanesan  professional de saude ida mak  la buka tuir  hodi  fo asistensia  saude  mak  inan ho oan buat ruma akontese  imi  hanesan  mediku, infermeiru no parteira ne’e sente oinsa  ,wanhira  la  konsege  salva inan ida ho nia oan nia vida”, hatete Rui Marai de Araujo.

Iha  fatin hanesan  Xefe Sentru Saúde  Vemasse  Afredo Da Costa rekonese  failansu  servisu  hirak ne’e  ,maibe iha futuru  sei esforsu  hodi  rezolve eru n’eebe iha.

“Ita labele fo sala  ba pesoal saude sira  ,tamba  dala ruma  inan isin rua sira mos mai rejistu  lakohi  mai cek ap nafatin  no balun mai rejistu  ba  fali fatin seluk  oinsa  pesoal saude sira  atu kontrolu, maibe  ne’e  ami  hatene ona  iha futuru ami sei  hadia  sistema servisu  atu  labele akontese tan” Xefe Sentru Saúde  Vemasse  Afredo Da Costa,resposta.tos