MS selu ona dívida hospital internasional balun

Segundu Vise Ministru Saúde Asuntu Planu Dezenvolvimentu Estratéjiku Saúde, Bonifacio Maucoli dos Reis, informa, Governu liu husi Ministériu Saúde (MS) selu ona dívida hospital internasional balun mak hanesan Hospital Singapura, Malaysia inklui Siliwang-Bali no Jakarta, ne’ebé durante ne’e pasienti Timor-oan halo tratamentu ba.

Bonifacio hateten, MS konklui ona dívida hospital internasional hirak ne’e no hela de’it Hospital Sanglah-Bali, tanba kestaun tékniku.

“Realizasaun pagamentu ba Hospital Internasional ne’e ita hahú ona iha segunda foin lalais ne’e, mas iha balun mos ita seidauk selu, tanba kontratu mate entaun ita hein to’o hadia mak ita foin bele selu”,Segundu Vise Ministru Saúde Asuntu Planu Dezenvolvimentu Estratéjiku Saúde, Bonifacio Maucoli dos Reis ba Jornalista sira iha nia servisu fatin Kaikoli, Díli (19/10/2018).

Bonifacio hateten, oras ne’e dadauk Ministériu Saúde esforsu atu selu hotu ona dívida ho total millaun US$ 2.4, ne’ebé mak MS iha.

“Sira seluk ne’ebé ita selu ona ne’e hotu ona ita laiha tan buat ida, hela tan ida ne’ebé mak ita seidauk selu liu-liu Hospital Sanglah Bali tanba nia kontratu mate, ita hein halo tan nia amandementu pois mak ita foin selu”,dehan nia.

Bainhira husu kona-ba total orsamentu ba hospital Internasional sira ne’ebé mak mensiona iha leten, Segundu Vise Ministru Saúde ne’e dehan, polítikamente nia parte hatene maibe teknikamente lahatene tanba kompetensia finansa nian.

Antes ne’e, Hospital Sanglah-Bali, fo ultimatu ba Governu Timor-Leste atu selu dívida ho total osan US$ 800.000.

Total dívida Hospital Internasional ne’ebé mak MS iha hamutuk US$ 2.4.Ola

Leave a Reply

Your email address will not be published. Required fields are marked *