Enfrenta problema krize finanseiru, MS sei ba vizita klínika Bairo-Píte

Vise Ministra Saúde Asuntu Kuidadu Saúde Primária, Elia António de Araújo dos Reis, promete, tempu badak MS sei hasoru malu ho lideransa sira iha Klínika Bairo-Píte hodi rezolve problema  krize finanseira ne’ebé mak klínika ne’e infrenta.

Elia haktuir,  dadaun ne’e MS hetan ona informasaun kona ba problema ne’ebé klínika Bairo Píte infrenta, li-liu kona ba orsamentu.

 “Ha’u hetan ona konvite ida husi dutor Daniel Murphy, tanba ne’e tempu badak  ha’u sei ba hasoru hodi ko’alia kona ba posibilidade saida mak ita bele ajuda, tanba durante ne’e saida mak ita bele ajuda hanesan aimoruk, rekursus humanus ita ajuda hela”,  hatete Elia António  de Araújo dos Reis, ba Jorlista sira iha Laboratóriu Nasional Bidau Díli, Kuarta (12/6/2019).

Elia esklarese, antes ne’e Ministériu Saúde fó ona apoiu orsamentu ho montante rihun atus ida lima nolu (USD150) ba durasaun tempu fulan tolu, hahú husi Outubro to’o Dezembru hodi bele mantein esistensia klínika refere, maibé dadaun sira enfrenta problema krize finanseiru, MS sei  buka dalan  posibilidade saida mak bele ajuda.

“Momentu ne’e iha tinan 2018, Ministériu saúde fó apoiu orsamentu ho valor Dolar Americano rihun atus ida lima nolu (USD 150), ba Klínika Bairo Pite, tanba iha momentu ne’e ita-nia orsamentu iha  Outobru, entaun ita apoiu sira iha momentu ne’e to’o iha Dezembru, depois ne’e sira hato’o fali proposta no sira hato’o duni proposta, maibé ita presiza haree depois ita buka dalan para ajuda Klínika Bairo Pite”, hatete Elia.ola