AME kondena aktu profesór haruka estudante rei-malu

Autoridade Munisípiu Ermera (AME) kondena maka’as atitude profesór ne’ebé haruka estudante feto na’in rua (2) rei-malu iha eskola 20 de Agosto Ermera, tanba konsidera aktu refere hatudu hahalok imoral ba públiku.

Prezidenti AME, José Martinho dos Santos Soares, informa, profesor ne’e nu’udar edukador, nune’e labele hanorin  estudante ho hahalok hirak ne’ebé la edukativu no  la kondiz ho kultura Timor.

“Ha’u rona imformasaun ida ne’e, ha’u bolu Diretor Edukasaun, ha’u fó kedas orden atu halo investigasaun ba asuntu ne’e, tanba atitude sira ne’e la ajuda ita nia alunu sira, atu muda sira nia hahalok, tanba estuda ne’e iha buat rua, hanesan buka matenek no hadi’a hahalok”, Prezidenti AME ne’e ba GMN  iha  munisípiu Ermera, Sesta (25-10-2019).

Nia esplika, eskola ne’e la’os atu buka deit matenek, maibé atu hadi’a mós hahalok ema ni’an, tanba ne’e mak ema dehan edukasaun no aprendijazen.

“Edukasaun mai husi uma laran ho profesor sira atu hanorin ema labele ho atitude hanesan ne’e, tanba ne’e profesor hatudu hahalok immoral, ladun kona ho situasaun no komunidade nia moris, buat sira ne’e hotu tenki foti medidas ne’ebè rigorozu. Tenki halo prosesu tuir regras funsionáriu públiku ni’an no prosesu ba kazu ne’e tenki la’o”, tenik José.

Antes ne’e, Prezidenti Parlamentu Nasional (PN), Arão Noe mós lamenta ho atitude husi edukador ida ne’ebé haruka estudante na’in 2 rei-malu iha  eskola. Alende ne’e mós Ministra Edukasaun Juventude no Desportu (MEJD), Dulce de Jesus, hateten, nia sei fó sansaun ba profesor refere iha tempu badak.

Entretantu atitude profesor iha eskola 20 de Agosto Ermera ne’e sai peokupasaun públiku, relasiona video ne’ebé sai virál iha média sosial facebook. Ety

 

Leave a Reply

Your email address will not be published. Required fields are marked *