EBC Cribas uza be’e mota hodi tein merenda eskola

Diretóra Ensinu Bázika Centrál ( EBC) Cribas,  Juvita Inacia da Costa, hatete distribuidór merenda eskolar nian uza be’e mota hodi tein hahan ba estudante sira han loro-loron.

“Hau nu’udar komunidade no mós diretóra eskola sente tristeza tebes,tamba ami iha suku Cribas ne’e infrenta problema be’e mós ne’e iha tinan barak ona, maibé to’o agora Govenru kontinua taka matan, maske ami hato’o bebeik ba Ministériu Edukasaun no Saneamentu munisipiu Manatuto,maibé to’o agora laiha resposta diak ida mai ami,ami husu bebeik ,tamba ami nia estudante han merenda eskolar mak hetan komplikasaun ruma ba nia saúde, ema dehan ami mak sala, maibe be’e mós laiha,  pasiensia ami tenki uza be’e mota hodi tein merenda eskolar loro-loron”, dehan Diretóra Ensinu Bázika Centrál Cribas hato’o kestaun nee ba JNDiário, Kinta (21/11), iha nia servisu fatin EBC suku Cribas,Postu Administrativu Manatuto,Munisipiu Manatuto.

Juvita Inacia haktuir katak Eskola Bázika Centrál iha suku Cribas infrenta krize be’e mós ne’e desde iha tinan 2014 to’o agora, maske hato’o bebeik ona ba Ministériu Edukasaun no parte Saneamentu Munisipiu Manatuto ,maibe seidauk iha resposta positiva.

Juvita Inacia da Costa esplika liu tán, haris fatin iha eskola dadaun ne’e sai sabraut no foer hotu , tamba estudante sira utiliza loro-loron ,maibé laiha be’e atu hamos.

Diretóra EBC Cribas nee husu apoiu ba organizasaun FAO hodi halo konstrusaun tanki Rua no oferese ba eskola refere atu iha tempo udan sira bele akumula udan be’en iha uma kakuluk eskola nian nune’ sira bele uza loro-loron.

Iha fatin hanesan Xefe suku Cribas ,Postu Administrativu Manatuto,Munisipiu Manatuto, Eurico Alves ,rekoñese komunidade no estudante sira durante ne’e konsumu be’e mota, hodi tein merenda eskolar , tamba be’e mós laiha.

Eurico Alves,mós  agradese ba organizasaun FAO,tamba bele oferese ona tanki rua ba eskola refere ,hodi akomoda udan be’en atu estudante sira utiliza loro-loron.

Diretór Ministériu Agrikultura no Peskas Munisipiu Manatuto, Tomas Francisco, hatete tanki rua  ne’ebé organizasaun FAO oferese ba EBC Cribas ne’e, atu haforsa reziliensia komunidade afetadu husi bai loro naruk.

Projetu konstrusaun tanki rua ne’ebé organizasaun FAO oferese ba EBC Cribas ne’e ,gasta orsamentu ho montante $ 18.000.Tos