Finalista ICS 194 simu graduasaun

Iha semana ne’e, Instituto Ciências da Saúde (ICS), realiza seremonia graduasaun ba dala tolu ba fianalista sira ne’ebé remata ona sira nia estudu iha nível baicharelatu, seremonia graduasaun ne’e hala’o iha salaun Canossa-Has Laran Dili.

Total finalista ne’ebé simu graduasaun, 194 kompostu husi departamentu enfermajen, parteira, farmasia, no departamentu nutrisaun e dietétika.

Reitor ICS Miguel Quintão hateten, seremonia graduasaun hanesan finalizasaun husi estudu maibe inísiu husi etapa moris iha kampu de servisu.

“Seremonia graduasaun ne’e laos hanesan seremonia deit maibe hanesan mos eventu espesial ida, hatudu remata ona estudu, servisu no fo edukasaun formal ba estudante, instituto saude timor leste, hodi dezenvolve potensia hodi sai nu’udar ema ne’ebé obedese ba maromak, seremonia gradusaun ida ne’e hanesan final inisiu ba moris graduadu ida atu planu no atu halo kareira ba moris, husi imi balun sei tama iha vida servisu no servi ba komunidade” dehan, Miguel Quintão iha ninia diskursu, kinta(27/12/2019)

Iha fatin hanesan Graduada Letícia Ximenes konsidera susesu ne’ebé hetan tanba kontribuisaun husi parte hotu no ikus mai bele realiza mehi ne’e.

“susesu ne’ebé agora dadaun ami hetan,laos tanba mai nia an maibe tanba papa ho mana no familia sira hotu no ema hotu ne’eb’e hola parte hodi esforsu tomak atu bele hola parte hodi ami bele realiza ami nia mehi ida ne’e, agradese mos ba belun sira hotu ne’ebé suporta ona ami husi material,esperitual, moral no korajen”dehan Letícia Ximenes

Partisipa iha seremonia graduasaun ne’e membru Parlamentu husi komisaun E, Diretora Jeral Ensinu Superior, Padre, estrutura ICS tomak, konvidadu sira no mós família graduadu sira.GMN