Janeiru-Outubru 2019, Bebé moris iha HNGV hamutuk 4219

Xefi Gabineti Kontrolu Kualidade Hospital Nacional Guido Valadares (HNGV), Sara Maria Xavier, hateten, hahú husi fulan Janeiru to’o fulan Outubru, tinan ne’e, bebé ne’ebé moris iha HNGV hamutuk 4219.

“Bebé sira ne’ebé moris iha maternidade hahú husi fulan Janeiru to’o Outubru 2019 hamutuk 4219, ba Bebé ne’ebé moris normal iha 3059 no ba sira ne’ebé partu liu husi sejariana hamutuk 805. Bebé sira ne’ebé moris liu husi partu instrumental hamutuk 369 no Bebé ne’ebé moris ho pozisaun kidan mak uluk hamutuk 105”, Xefi Gabineti Kontrolu Kualidade ba GMN iha ninia kna’ar fatin HNGV, Díli, Kuarta (04-12-2019).

Sara esplika, inan sira ne’ebé baixa iha sala maternidade hahú husi fulan Janeiru to’o Outubru, tinan ne’e, hamutuk 721 no husi númeru ne’e fahe ba kazu obstritisia pasiente 554 no kazu zenekólojia hamutuk pasiente 147.

“Kazu 10 ne’ebé maioria iha maternidade durante fulan 10, ne’e inan sira ne’ebé mai ho kazu abortu inkompletu, inan sira ne’ebé gravida ho fulan ida ou fulan rua, depois sofre ho laran-sa’e no muta, inan sira ne’ebé hetan sejariana ho indikasaun Bebé sofrementu fetal, inan sira ne’ebe ho sejariana ou hetan ona operasaun ba isin-rua dahuluk, inan sira hakarak ba kesi tiha oan fatin, inan sira ne’ebé mai ho ameasa abortu, inan ne’ebé ho kista ováriu no ikus liu mak inan sira ne’ebé partu kleur”, tenik Xefi Gabineti Kontrolu Kualidade HNGV.

Tuir dadus husi HNGV, inan ne’ebé mak mate iha maternidade hahú husi fulan Janeiru to’o Outubru, tinan ne’e, hamutuk nain 10, tanba mai ho kondisaun grave. eni

Leave a Reply

Your email address will not be published. Required fields are marked *