Konsidera hadau malu poder, Luis Lobato sujere PM troka Vise MS na’in rua

Eis Vise Ministru Sáude (MS), Luis Lobato, lamenta ho atitude Vise MS na’in rua (2), hanesan ministra Elia António Amaral no Bonifácio Maukoli dos Reis ne’ebé hada’u malu poder iha Diretor sira-nia oin, hodi hamo’e deit setor saúde.

”Hau lamenta ho akontesimentu ne’e, MS ne’e setor importante teb-tebes iha nasaun ida ne’e, temi kona-bá saúde, edukasaun, agrikultura ne’e setor prioridade, ha’u hanesan eis Vise MS senti katak, la devia akontese lia-fuan sira hanesan ne’e, disputa sira hanesan ne’e hatudu inserteza dezenvolvimentu iha setor saúde. Ha’u depois de haree video ne’ebé akontese iha média, ha’u lamenta teb-tebes ho disputada poder ne’e, loos duni governu ne’e Aliansa Maoria Parlamentar (AMP), maibé nasaun ne’e povu no Timor-Oan tomak ni’an, hanesan mós iha MS, loos duni lideransa na’in 2 mak Vise MS na’in 2, maibé MS ne’e hanesan knu’uk ba profisional saúde tomak, ha’u ema saúde, ha’u mós uluk tama hanesan fundador ba MS hamutuk ho ekipa médika, ami hamutuk na’in 16 hamosu East Timor Healty Working Group, depois mai iha tranzisaun nia laran to’o ohin loron mosu to’o MS República Democrática de Timor-Leste”, afirma eis Vise MS ne’e ba GMN iha ninia kna’ar fatin Delta Nova, Sábadu ne’e.

Nia akresenta, ho akontesimentu ne’e, nia parte husu ba Primeiru Ministru (PM), Taur Matan Ruak, atu troka sira na’in 2.

Entretantu diskusaun entre Vise Ministra Kuidadu Saúde Primária, Elia António Amaral no Ministru Saúde interinu, Bonifácio Maukoli dos Reis ne’e, sai viral iha média sosial no halo ema barak fó komentáriu, tanba senti triste ho hahalok Vise MS na’in 2 ne’e. ina