MS transfere ona osan alojamentu ba pasiente iha Bali

Diretóra Jeral Prestasaun Saúde, Ministériu Saúde (MS), Odete Viegas, hateten, MS transfere ona osan alojamentu ba pasiente sira iha Bali-Indonézia.

“Felismente osan sira ne’e tansfere hotu ona, ami mós komunika internalmente ho Direcção Nacional Serviço Hospitalares komunika ho adidu iha Bali-Indonesia, atu nune’e bele atende mós pasiente sira iha Jakarta, Siloam no Surabaya, nune’e semana oin bele foti ona osan”, Diretóra Jeral Prestasaun Saúde MS ne’e ba jornalista sira iha Palásiu Sinja, Kaikoli, Sesta (13-12-2019).

Odete esplika, kona-bá prosesu pagamentu ba pasiente sira, dau-daun ne’e la’os ba iha estranjeiru deit, maibé ba iha rai-laran mós hanesan no prosesu husi Ministériu Finansas mós ho regras rigorozo uitoan.

“Ha’u fó ezemplu hanesan orsamentu ba iha área programátika sira hanesan kuarter 1 to’o 3, la’os la-lais, tanba iha regras ne’ebé husi Ministériu finansas rasik maka iha ka dau-daun ne’e sira mak halo prosesu sira ne’e”, tenik Diretóra Jeral Prestasaun Saúde MS ne’e.

Nia akresenta, kona-bá situasaun pasiente sira iha estranjeiru mós dalaruma óspital Siloam haruka relatóriu tarde no sé haruka mai MS sei halo verifikasaun, liu husi Direcção Nacional Serviço Hospitalares no to’o ba Diresaun Finansas, MS sei haree relatóriu sé la loos tenki haruka fali ba sira.

“Ita ko’alia ba osan, ne’e responsabilidade boot ida, prosesu sira tuir ha’u nia hanoin di’ak liu ita investe ita-nia rai, ita haruka pasiente ka la’os iha rai-laran ne’e prosesu no ita tenki la’o tuir kritéria haree ba komplikasaun barak ne’e, MS hanoin ona katak Óspital Nasional ne’e ita tenki prepara atu hadi’a kondisaun, liu-liu ba koras sira hanesan fase-rán, kurasaun no mós onkólojia kanker ni’an, agora dau-daun óspital hahu ona hadi’a kondisaun, ita nia pasiente  sira bele trata iha ne’e, la presiza ba iha rai-liur, hodi nune’e diminui kustu“, subliña Odete.

Antes ne’e, deputadu bankada FRETILIN, Antoninho Bianco, preokupa, pasienti Timor-Oan sira iha Indonesia, tanba seidauk simu osan husi MS durante fulan 4, hafoin simu mensajen husi pasiente sira ne’ebé durante ne’e hala’o tratamentu iha óspital Bali-Indonesia. ety