Estudante asesu ba UNTL-IPB hamutuk 3.865

Ministru Ensinu Superior Siensia no Kultura (MESSK) Longuinhos dos Santos hatete, tinan ne’e Ministériu sei simu estudante foun, ne’ebé asesu iha Universidade Nasionál Timor-lorosa’e (UNTL) hamutuk 3.865 bazeia ba proposta husi UNTL.

“ Husi númeru  ne’e ami sei fahe ba parte 2, hanesan UNTL iha estudante hamutuk 3.665  no Institutu Politekniku Betano (IPB) iha estudante 200,”dehan Ministru Ensinu Superior Siensia no Kultura, Longuinhos dos Santos, segunda (06/01/2019) iha Parlamentu Nasionál.

Ministru Ensinu Superior dehan, iha kategoria 2 hanesan rejime espesial no reijme jeral, ne’ebé jeral sei simu estudante hamutuk 2.654 no rejime espesial hamutuk 1011, ne’ebé sei fo oportunidade ba veteranus nia oan, difisiensia, diplomata no estudante ne’ebé ho idade 23 ba leten.

“ Tinan ne’e ami halo redusaun ba númeru estudante asesu UNTL ho IPB, tanba hare ba kondisaun no espasu universidade bainhira ita koalia konaba atu garante kualidade, tanba ensinu superior oinsa mak atu eleva kualidade estudante sira nian, hadia infraestrutura, biblioteka, laboratorium no hare mos kondisaun Dosente no professores sira,” afirma Longuinhos dos Santos.

Nia dehan, redusaun númeru ba estudande asesu UNTL ho IPB ne’e laos halo deit, maibé liu husi enkontru ho estrutura UNTL no IPB, inklui Ministériu mos haruka ekipa tun hodi halo observasaun no fiskalizasaun ba kondisaun UNTL ho IPB ne’ebé iha, tanba ne’e ami análiza ho kondisaun sira hotu ikus hodi halo redusaun ba númeru estudante tinan 2020 nian.

“ Rejistrasaun ba estudante asesu rejime espesial no rejime halo hotu ona, no hein deit fim de Janeiru mak sei haruka rezultadu ba ensinu superior públiku rua UNTL ho IPB, atu labele atrazu kalendariu akademika estudante sira nian.” Fel