JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Governu hili Tibar sai fatin izolamentu ba COVID-19 ■Komunidade protesta desizaun Governu

Governu hili Tibar sai fatin izolamentu ba COVID-19 ■Komunidade protesta desizaun Governu

Fatin Isolamentu ba COVID-19, Tibar

Governu liu husi Ministériu Saúde (MS) hili ona Tibar, postu administrativu Bazartete, munisípiu Liquiça, sai fatin izolamentu ba ema infetadu moras coronavirus (COVID-19).

Diretora Jerál Prestasaun Saúde, Ministériu Saúde (MS), Odete da Silva Viegas, hateten, atu prevene COVID-19 tama iha Timor-Leste (TL), MS prepara ona fatin izolamentu iha Tibar-Liquiça.

“MS hamutuk ho Ministériu Obras Publika (MOP), Protesaun Sivíl, Bombeiros, Cruz Vermelha Timor-Leste (CVTL), ami hala’o servisu máximu atu tau fatin ne’e, iha fatin infelizmente iha dader to’o kalan, fatin sira ne’e preparadu hotu ona. Fatin Tibar ne’e hanesan fatin ida ne’ebé mak apropriadu ho espasu ne’ebé luan no do’ok husi komunidade, tanba ne’e komunidade mak tenke koopera ho Governu”, Diretora Jerál Prestasaun Saúde MS ne’e ba GMN iha ninia kna’ar fatin Palaçio das Cinzas, Caicoli-Díli, Segunda (09-03-2020).

Nia akresenta, fatin ne’ebé indikadu ona iha Tibar ne’e apropriadu atu akumula ema ne’ebé infetadu COVID-19, ho nune’e komunidade sira mós tenke koopera ho Governu.

“Ita haree fatin ne’e, fatin ida ne’ebé izoladu, ne’ebé hakarak ka lakohi ita tenke tau ona fatin fiksu iha ne’ebá, atu nune’e, karik iha ema infetada ba coronavirus karik, ita iha ona fatin para bele tau ema ne’ebé afeita ba moras refere. Komunidade hala’o atuasaun hasoru MS, tanba informasaun seidauk to’o ba iha komunidade, maibé MS nia papél atu asegura moras ne’e labele kona komunidade”, tenik Odete.

Nia informa mós katak, loos duni komunidade sira rejeita atu estabelese fatin ba infetadu COVID-19 iha Tibar, ne’e parese tauk vírus refere da’et ba sira.

“Komunidade halo rejeisaun, maibé ha’u duni mak halo esplikasaun ba sira, karik informasaun ba sira mak seidauk to’o, tanba ne’e mak ita boot sira halo atuasaun ou aktu ne’e, maibé atu hateten de’it ba ita boot sira katak, em prinsípiu MS nia papel ne’e, atu asegura moras ne’e labele kona ba ita boot sira, ninia objetivu finál mak ida ne’e, la’ós atu lori moras ne’e mai tau fali iha ita boot sira nia klaran ne’e la’e”, subliña Diretora Jerál Prestasaun Saúde MS ne’e.

Lee hotu :   Moras mental presiza atendimentu diak husi pesoal saúde

Fatin izolamentu ba infektadu COVID-19 hamutuk uma 7 no uma 7 ne’e utiliza ba fatin karantina, inklui fatin ba profisionál saúde, hanesan médiku, enfermeiru no enfermeira sira.

Dau-daun ne’e MS, liu husi Departamentu Promosaun Saúde, tun ona ba baze hodi halo sosializasaun ba komunidade, liu-liu ba líder komunitária sira, tanba líder komunitária sira mak reprezenta Estadu iha komunidade.

Komunidade Tibar protesta desizaun Governu

Komunidade aldeia Turliu, suku Tibar, postu administrativu Bazartete, munisípiu Liquiça, halo asaun protesta hasoru Ministériu Saúde (MS), ne’ebé hili Tibar sai fatin izolamentu ba moras coronavirus (COVID-19).

Porta voz, Ester Aparisio, hateten, asaun protesta ne’e, komunidade suku Tibar halo, tanba la konkorda ho planu MS ni’an atu estabelese fatin izolamentu ba coronavirus (COVID-19) iha suku ne’e, tanba perigu ba komunidade nia vida.

”Ami komunidade suku Tibar ne’e mak wanhira MS kontinua instalasaun fatin izolamentu corona virus iha fatin ne’e nafatin maka ami sei halo asaun forte hasoru ministériu saúde”, promete porta voz ne’e iha Tibar-Liquiça, Segunda (09-03-2020).

Komunidade, Plasidio Pereira, rejeita, tanba suku Tibar la’ós fatin atu akumula moras hirak ne’e mai hotu iha fatin refere, hanesan lixu, tuberculose, moras mental, HIV/SIDA, defisiénsia no coronavirus (COVID-19).

“Ami komunidade suku Tibar la’oós fatin para lori moras sira iha TL ne’e mai hotu iha Tibar, lixu, HIV/SIDA, TBC no coronavirus (COVID-19), ami mós ema hanesan sidadaun Timor, Ministra Saúde keta matan delek karik, ami ohin kalan haree suspeitu ka ema ne’ebé moras coronavirus kona ona ne’e mai ona iha laran, ne’ebé ami hein to’o nia sai husi fatin ne’e, sé la’e ami uza kekerasaun hasoru PNTL”, hateten komunidade Tibar ne’e.

Entretantu komandante Polísia Nasional Timor-Leste (PNTL), munisípiu Liquiça, Superintendente Asistente Luis da Silva, hateten, komunidade Tibar nia asaun ne’e seidauk hetan lisensa husi autoridade lokál no PNTL munisípiu rasik.

“Ami somente hala’o lei no orden seguransa nini’a, maibé atu tau corona iha ne’e ka laiha ne’e desizaun MS ni’an, ami hala’o seguransa iha fatin refere, para labele iha konflitu ka asaun fíziku ruma, wanhira komunidade sira halo asaun hasoru MS”, informa Superintendente Asistente PNTL munisípiu Liquiça ne’e.

Lee hotu :   Razaun troka Diretór HNGV

Iha momentu ne’e PNTL lori kedas responsabel na’in 4 husi asaun refere ba polísia munisípiu Liquiça, hodi submete ba investigasaun.

“Ami lori responsabel na’in 4 ne’e ba asaun ne’e, PNTL munisípiu Liquiça para bele konfirma no halo karta ruma entre komunidade ho PNTL, nune’e bele fó autorizasaun ba sira atu bele hala’o asaun, sé la’e PNTL bele kaptura tuir lei haruka”, tenik Lus.

Razaun komunidade sira la aseita estabelese fatin izolamentu ba infetadu coronavirus (COVID-19) ne’e, tamba suku Tibar dau-daun ne’e sai fatin ba lixu, moras tuberculose, HIV/SIDA no selu-seluk tan.

MDI husu komunidade kontribui  ho Estadu

Komunidade  Tibar  halo asaun hodi protesta Governu liu-liu Ministra Saúde  ne’ebé hili Tibar sai fatin izolamentu ba ema ne’ebé mak infetadu Corona Virus Disease (COVID-19). Maibe Ministru Defeza no Interior Interinu (MDI), Filomeno Paixão, husu komunidade atui kontribui ho Estadu.

Komandante PNTL munisípiu Liquiça Interinu Superintendente Assistente Luis da Silva hateten, iha Domingu (08/02/20) mais ou menus tuku  7 kalan oras  Timor-Leste, komunidade  Tibar  halo asaun hodi kontra Ministra Saúde  ho  nia ekipa sira ne’ebé mak  atu estabelese fatin izolamentu ba ema sira ne’ebé mak infetadu COVID-19.

Maibé durante sira nia prezensa, komunidade Tibar halo asaun kontra Ministra Saúde ho nia ekipa sira.

Alende protestu, komunidade balun deskonfia hasai anin roda kareta hamutuk tolu ne’ebé mak para hela.

 Maibé la kleur de’it PNTL munisípiu Liquiça to’o  iha fatin akontesimentu   no apoiu husi membru Batallaun Orden Públiku, hodi lansa tiru gas lakremujéniu hodi hafahe tiha komunidade sira halo asaun ne’e.

“Ministra Saúde ho nia ekipa  tomak  dezloka ba Liquiça, liu-liu iha Tibar ninian, ba iha  ne’ebá sira atu identifika fatin tolu hodi tau ita nia komunidade ne’ebé mak deskonfia kona  vírus korona,  kuandu komunidade sira rona dehan besik liu sira nia uma, entaun sira la simu, tanba  ne’e horikalan komunidade sira protesta maka’as no halo problema iha fatin refere, entaun horikalan ha’u rasik no ha’u nia adjuntu no Task-Force  ami tuun ba atua, aumesmu tempu BOP. Horikalan  mais ou menus tuku 11 hanesan ne’e mak Vise Ministru sai husi ne’ebá  situasaun kontroladu”,esplika Komandante PNTL munisípiu Liquiça Interinu Superintendente Assistente Luis da Silva, ba jornalista sira Segunda (09/02/20) iha Sentru Formasaun Polísia Comoro.

Lee hotu :   Jornalista nain 6 benefisia bolsu estudu husi Embaixada Amérika

Alende  ne’e Ministru Defeza no Interiór Interinu Filomeno Paixão hateten, virus korona moras ne’ebé  periogozu. Tanba ne’e  governante ne’e husu komunidade atu  kontribui  ho Estadu atu harii  fatin izolamentu ida hodi ta’u ema sira ne’ebé mak  deskonfia kona vírus korona.

 “Ha’u la’os koalia ba  komunidade simu ka la simu, maibé  ne’e ténki simu posizaun ida atu buka fatin defenitivu atu koloka, tanba moras ne’e perigozu. Tanba  ita haree iha   iha mundu sira kona oituan-oituan, balun oras ne’e iha Estadu ida pior. Tanba   ne’e ha’u nia apelu ba komunidade tomak  ita hotu tuur hanoin tau ses hotu de’it,  para depois haree fatin ne’ebé mak diak ita kontribui para Estadu haree lalais fatin  izolamentu ida hodi tau ema  ne’ebé iha ne’e hela,sé  ita la tau izolamentu pior ida”, dehan Filomeno Paixão.

Nune’ee Komandante Jerál PNTL Komisáriu Faustino da Costa hateten, iha akontesimentu ne’e Políisa la detein ema ruma maibé Polísia tiru  lansa de’it gas lakremugéniu hodi  hapara asaun husi komunidade.

“Horikalan mosu problema iha Tibar,  ida ne’e situasaun mosu spontania  bainhira ekipa COVID-19  desloka ba iha Tibar hodi prepara fatin, kazu deskonfia ema balun karik  sira bele prepara fatin  iha Tibar, entaun komunidade iha area ne’ebá  la satispas derepenti sira impede, emprinsipiu hanesan sira dehan, ami Tibar ne’e foer sira iha Díli ne’e lori mai ona, tantu ema nia foer hotu mai tau iha ne’e, ema nia moras Tuberkuloze (TBC) iha fatin hotu-hotu mai tiha ami  nusa mak moras Korona mai tan ami”,dehan Faustino da Costa.

COVID-19 hamate ona ema iha nível 3.595  iha nasaun mundu   no ema  sira ne’ebé  mak infetadu  105.836.eni/ tos/avi

Add to Comments Here!!!!

error: Content is protected.
Secured By miniOrange
You might also like:
PUDD: Koligasaun foun sei hakotu impase polítiku

Liu husi konferénsia estraordenáriu Partidu Unidade...

Atu priense rekezitus koligasaun, KHUNTO aprova ona rezolusaun nú 4/KN-P.KHUNTO/III/2020

Partidu Khunto ne’ebé hola parte iha...

BNCTL lansa fatuk dahuluk ba edifísiu foun

Banco Nacional Comercio Timor-Leste (BNCTL), lansa...

Close