Ministériu Saúde Kontrola Makaas Timor-oan sira iha Kuarentena

Diretora Jeral Prestasaun Saúde, Odete Viegas hatete, Timor-oan balun ne’ebé oras ne’e dadauk hala’o karantina komesa hatudu ona sintoma ba Corona Vírus Disease 2019 (COVID-19) ho nune’e ekipa sei foti amostra hodi halo teste.

“Balun iha, agora iha, ha’u sedauk hatene hira maibé balun komesa hatudu sintoma, ema Timor-oan ne’ebe agora dadauk halo karantina ne’e sira hatete balun mos agora iha ne’e hanesan iha Tibar, desenvolve sintoma entaun tekniku sira tenke ba foti amostra,” dehan, Odete Viegas hafoin partisipa iha enkontru konsellu interministerial iha Centro Convenções Dili, Domingo (29/03/2020).

Odete esplika, karantina nia funsaun ne’e rasik hodi haree, ema sira bele desenvolve sintoma ou lae, ho nune’e wainhira pasa ona loron 14 bele ona fila ba sira nia fatin.

Karantina ne’e mairoria ema Timor-oan deit, maibé iha ema estranjeiru ida ou rua mak tama, iha mos balun isin rua, antesedente moras no sira ne’ebé iha idade idozu tenta tau iha fatin apropriadu.

Ministeriu Saúde mos tenta atu bele buka solusaun hodi bele halao karantina ba ema ida iha kuartu ida atu bele halo prevensaun ba COVID-19.

Odete aprofunda liutan, to’o ohin loron kuaze 500 mak halo karantina, tanbá iha loron 29 fulan ne’e, Timor-oan barak mak foin mai husi estranjeiru ne’ebé mai ho Aviaun Citylink hamutuk 97, Sriwijaya hamutuk 78 no husi Singapura ema nain ida.

Atu bele hatan ba numeru ne’eb’e aumenta kuaze 100 resin, governu akomoda ona Ótel 10 inklui Tibar no INAP hodi hala’o karantina.

Odete hatutan, wainhria aviaun la halo ona movimentu mak sei ajuda liu tan servisu Ministeriu Saúde nian tanbá ekipa bele halo kontrola ho maximu ba ema sira ne’eb’e hala’o hela karantina.Ida