Sentru saúde Becora rejista moras dengue 70

Xefe Sentru Saúde Becora, Adelina Pinto, informa, husi fulan Janeiru to’o Abril ne’e, rejista pasiente moras dengue hamutuk 70 maioria labarik, ne’ebé mai ho moras seluk hanesan diarea no infesaun respiratóriu.

“Ami sentru saúde Becora, loron ida ami nafatin atende pasiente 200 to’o 350, kazu aas liu mak nafatin infesaun via-respiratoriu no iha kazu seluk mak hanesan diarea ladun barak, iha mos dengue nain 15 no direitamente ba klinika seluk,no rejista iha 70 resin ba moras dengue,” dehan, Adelina ba Jornalista GMN, iha nia kna’ar fatin, Kinta (16/04/2020).

Adelina hatutan, Sentru Saúde Becora mos nafatin fó asisténsia saúde ba komunidade mesmu ho ekipamentu minimu no iha situasaun Estadu Emerjénsia.

“Preparasaun ba hasoru kazu COVID-19 mesmu minimu maibé lá signifika katak lá atende pasiente maibé iha regra no treinamentu balun husi OMS nune’e ami iha pessoal treinadu no kuandu identifika prepradu ona no kuandu atendimentu bai-bain uza nafatin maskara no luvas,” dehan, Xefe Sentru Saúde ne’e.

Adelina aprofunda liutan, maske agora mundu preokupadu ho surtu COVID-19, maibé sei iha moras seluk mak fo ameasa ba komunidade iha Timor-Leste (TL) hanesan moras dengue.

Antes ne’e, Sentru Saúde Comoro mos rejista moras dengue ho pasiente hamutuk 62, no tuir dadus ne’ebe fo sai husi Servisu Saúde Munisípiu Díli, hahu husi Janeiru to’o Abril  rejista moras dengue kuaze 400.Ida