Timor-oan 124 pasa ona kuarentena fila ba uma

Diretor Jeral Prestasaun Saúde Ministériu Saúde, Odete Viegas, hatete, Timor-oan na’in 124 fila ona ba ida-idak nia munisípiu hafoin kompleta prosesu kuarentena durante loron 14.

“Durante konfinamentu besik ona 14 dias, balun hatudu sintoma ne’e diak tanba bele kontrola kedas, teste negativu entaun bele fo sai, husu ba alin sira atu kontinua halo distansia sosial no aplika regra sira,” dehan, Odete Viegas, iha Ótel Luz Clarita, Segunda (13/04/2020).

Odete esplika, iha fatin 5 diferente mak kumpri ona kuarentena loron 14 maibé atividade re-intrega ne’e halao deit ba ema 124 husi fatin 3 hanesan Tibar, São João Paulo no Ótel Vienna.

Enkuantu fatin rua seluk hanesan, Ótel Fortuna no Ótel Carla Mansion, sei supende tanba identifika ona ema balun hetan sintoma COVID-19.

Ekipa saúde mos fahe sertifikadu ba sidadaun sira ne’ebé kumpri ona tempu kuarentena loron 14 hodi sai evidénsia katak sira laiha sintomas ba COVID-19, maibé, tenke kontinua mantein meius preventiva sira ne’ebé Ministeriu Saúde fó sai ona.

Odete hatutan,prosesu kuarentena agora sei lao tuir regra husi organizasaun mundial saúde nian katak, ema ida, iha kuartu ida, hodi bele hamenus numeru kontaminasaun COIVD-19.

“Sira ne’ebé iha kuarentena tenke disiplina atu labele hamutuk no agora dadaun hahu ona atu koloka ema ida iha kuartu ida no halo dezinfekta ba fatin sira ne’e, kestaun mak medidas sira ne’e la kumpri tanba wainhira ema pozitivu entaun sira seluk bele pozitivu, agora ita aplika regra kuartu ida, maibé sira tenke disiplina selae sira rasik mak hakarak hetan moras husi ema ne’ebé pozitivu,” hakotu, Odete.Ida