COVID19-TL : Pasiente 4 hein teste konfirmasaun

Porta Voz Sentru Integradu Jestaun Krize (SIJK), Sergio Lobo, konfirma pasiente kazu pozitivu Corona Virus Disease 2019 (COVID-19) na’in hat (4) simu ona rezultadu teste primeiru ho negativu no sei hein teste segundu hodi halo konfirmasaun.

“Númeru total teste 952, aumenta teste 30, konfirmadu mantein 24, kazu rekuperadu 22 (18 konfirmadu, na’in 4 kazu provável), kazu konfirmadu ne’ebé sei iha izolamentu iha Vera Cruz nen (6), sira na’in 4 teste primeiru negativu ona, ita hein katak teste segundu ne’e mak negativu, entaun sira bele sai ona, na’in rua (2) ne’e teste sei pozitivu, maibé pozitivu baixu, entaun iha tempu badak sira bele sai”, Porta-Voz SIJK ne’e iha Centro Convenções de Díli, Tersa (12-05-2020).

Nune’e, total kumulativu ezame laboratóriu hahu husi loron 10, fulan Marsu to’o loron 12, fulan Maiu ne’e, hamutuk 952 ne’ebé ho rezultadu laboratóriu negativu hamutuk 781 no na’in 117 mak sei hein rezultadu teste.

Enkuantu total ema iha kuarentena ka konfinamentu obrigatóriu hamutuk 91, kompostu husi na’in tolu (3) autokuarentena iha Díli, 60 iha fasilidade Governu iha Díli no 28 iha fasilidade Governu iha munisípiu.

Total ema ne’ebé liu ona periódu kuarentena ka konfinamentu obrigatóriu hamutuk 2177, kompostu husi 476 iha munisípiu sira seluk no 1701 iha Díli.

Ministériu Saúde (MS) dau-daun ne’e halo vijilánsia sindromika katak, teste ema hotu ne’ebé aprezenta ho sintoma respiratóriu iha fasilidade saúde sira no mós vijilánsia sentinela.

Husu ba komunidade atu fó partisipasaun máxima ba aktividade vijilánsia ida ne’e, tanba ho aproximasaun aktiva atu buka kazu hanesan dau-daun SIJK halo liu husi aktividade MS ni’an mak ita bele antesipa no prevene transmisaun COVID-19 iha rai laran, antes moras ne’e fó susar ba ema. ida