SIJK alerta ba populasaun munisípiu tolu labele hakat liu fronteira

Sentru Integradu Jestaun Krize (SIJK) alerta ba populasaun munisípiu Bobonaro, Covalima no Rejiaun Administrativa Espesiál Oe-Cusse Ambeno (RAEOA) atu labele hakat ba-mai rai ketan ho Indonézia, tanba fó risku ba propagasaun Corona Virus Disease 2019 (COVID-19) iha Timor-Leste.

Tuir Porta-Voz SIJK, Rui Maria de Araújo, hateten, sidadun ne’ebé halo movimentu ou hakat klandestina iha fronteira Indonézia sei fó risku boot ba populasaun iha Timor-Leste, tanba bele lori COVID-19.

“Estadu-Maior Konjuntu SIJK husu ba populasaun tomak, liu-liu ba sira iha munisípiu Covalima, Bobonaro no RAEOA atu tuur hakmatek iha ida-idak nia fatin no labele hakat-ba-mai iha rai-ketan ho Indonézia, hodi nune’e la monu ba risku hetan da’et moras COVID-19 no lori mai hada’et tutan iha Timor-Leste nia laran”, Porta-Voz SIJK ne’e liu husi konferénsia imprensa iha Centro Convenções de Díli (CCD), Sesta (18-05-2020).

Rui informa, to’o agora sidadaun balun klandestinamente kontinua hakat-liu rai-ketan, husi Indonézia mai Timor-Leste ninia territóriu.

Husi periódu hahú Estadu Emerjénsia (EE) to’o agora total ema 110 mak hakat klandestinamente iha rai-ketan, husi total ne’e 48 iha rai-ketan Batugade, Salele na’in 8, Oesilo no Sakato hamutuk 58 no iha loron 15, Maiu lokra’ik no loron 16, fulan Maiu kalan Unidade Patrullamentu Fronteira (UPF) ka’er sidadaun Timor-Leste na’in hat (4) iha rai-ketan Oe-Cusse.

Tanba númeru kazu iha provínsia Nusa Tengara Timur (NTT) Indonézia aumenta ba bei-beik, inklui ho kazu óbitu ka mate, tanba COVID-19, F-FDTL ho PNTL sei nafatin fó apoiu ba malu no liu husi kolaborasaun ho líder komunitáriu sira sei nafatin halo vijilánsia máxima iha dalan klandestina sira hotu iha rai-ketan entre Timor-Leste ho          Indonézia.

Maske númeru pozitivu COVID-19 iha Indonézia, liu-liu provínsia NTT sa’e maka’as, maibé to’o agora Governu Timor-Leste seidauk iha dezisaun  hodi kontinua prolonga tempu EE, tanba sei iha prosesu diskusaun nia laran.

Tuir dadus ne’ebé GMN asesu husi provínsia NTT dau-daun ne’e númeru kazu konfirmadu COVID-19 iha provínsia refere kuaze 70 resin, na’in ida (1) mate no na’in nen (6) rekoperadu. ida

Leave a Reply

Your email address will not be published. Required fields are marked *