JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Suspeitu COVID-19 Covalima konfirmadu negativu

Suspeitu COVID-19 Covalima konfirmadu negativu

Porta-Voz Sentru Integradu Jestaun Krize (SIJK), Odete da Silva Viegas, hateten, suspeitu Corona Virus Disease 2019 (COVID-19) ne’ebé identifika iha munisípiu Covalima konfirmadu ho rezultadu negativu.

Suspeitu refere hala’o servisu iha fronteira no halo kontaktu direta ho ema husi nasaun viziñu Indonézia no durante ne’e nia hatudu sintoma ba COVID-19.

“Kazu ne’e rejistu iha ospital referal Suai iha Domingu lokraik, loron 7, fulan ne’e, ho sintoma COVID-19 hanesan isin-manas ho temperatura 39, mear no kakorok moras, pasiente atende husi ekipa médiku iha fatin izolamentu no ekipa laboratóriu foti amostra transporta kedas mai Díli hodi halo teste ne’ebé ho rezultadu negativu”, Porta-Voz SIJK ne’e liu husi konferénsia imprensa iha Centro Convenções de Díli (CCD), Segunda (08-06-2020).

Odete akresenta, iha loron 4, fulan Juñu ne’e, suspeitu refere konsulta iha ospital no asesu ba sistema triajen, ho sintoma inus-been ho mear uituan, maibé pasiente refere la temi istoria kontaktu direta ho ema husi nasaun viziñu Indonézia.

Ema ne’ebé halo kontaktu ou besik suspeitu hamutuk na’in 20, inklui ninia feen ne’ebé ekipa hahú foti ona amostra, hodi bele hatene iha ka la’e transmisaun lokál iha komunidade.

Husi esperensia ne’e, Odete husu ba komunidade sira atu labele ta’uk, maibé tenke nakloke konta istoria viajen wainhira halo tratamentu iha ospital, atu nune’e, bele kontribui prevene no detekta kazu COVID-19 iha Timor-Leste.

Tuir dadus ne’ebé fo sai husi SIJK iha loron 8, fulan Juñu, kazu konfirmadu COVID-19 iha Timor-Leste sei mantein 24 ne’ebé rekoperadu hotu ona no dau-daun ne’e suspeitu na’in 38 mak hein hela rezultadu teste.

Lee hotu :   COVID-19 mantein 24, Liquisa suspeitu 27 negativu

Sidadaun 27 halo movimentu ilegal iha fronteira

Porta-Voz Sentru Integradu Jestaun Krize (SIJK), Odete da Silva Viegas, relata, hahú husi loron 28, fulan Maiu to’o loron 8, fulan Juñu ne’e, Unidade Patrullamentu Fronteira (UPF) konsege detekta ema 27 ne’ebé hala’o movimentu ilegal entre nasaun Indonézia no Timor-Leste.

“Sidadaun 27 ne’e balun kumpre hela periódu kuarentena no balun tenke deporta, tanba la’ós Timor-Oan, iha Batugade hamutuk 12, ne’ebé na’in 10 halo hela kuarentena no na’in 2 mak deporta, iha Salele-Suai hamutuk na’in 6 ne’ebé na’in 3 halo hela kuarentena no na’in 3 deporta, iha RAEOA kompostu husi Oesilo na’in 2, Passabe na’in 4 no Oelula na’in 3 ne’ebé husi total ema na’in 9 ne’e mak ema 1 deporta no na’in 8 mak halo kuarentena, kompostu husi estudante na’in 4”, Porta-Voz SIJK ne’e liu husi konferénsia imprensa iha Centro Convenções de Díli (CCD), Segunda (08-06-2020).

Entretantu dau-daun ne’e, kazu konfirmadu COVID-19 iha Provínsia Nusa Tengara Timur (NTT) Indonézia hamutuk 97, husi númeru refere na’in 14 rekoperadu no na’in 1 mate. ida

Add to Comments Here!!!!

error: Content is protected.
Secured By miniOrange
You might also like:
FONGTIL: Estrutura VIII Governu hatodan OJE

Diretór ezekutivu Forum Organizasaun Naun Govermental...

Arsenio Bano prontu lidera fali RAEOA/ZEEMS

Eis Presidente Autoridade Rejiaun Administrasaun Espesial...

Embaixadór Brazil orgullu partidu tolu forma polítika foun iha PN

Governu Brazil Orgulhu ho Partidu PLP,...

Close