Dom Virgílio: Edukasaun hanesan xave ba dezenvolvimentu TL

Arsebispu Arkidioseze Dili, Dom Virgílio  do Carmo da Silva, hateten, dioseze sei kontinua fó apoiu ba dezenvolvimentu edukasaun iha Timor, nune’e presiza kontribuisaun no servisu hamutuk husi parte hotu, tanba edukasaun hanesan ai-rin atu dezenvolve nasaun ida.

“Edukasaun ita hotu hatene ministériu ne’ebé boot teb-tebes, i komplikadu no dalabarak sempre mosu oi-oin, tanba futuru Timor nini’an, Timor nia futuru ne’e iha área ida ne’e, ita hotu tenke fó apoiu masimu, kooperasaun ne’e hakarak fó liman ba malu, tanba haree ba importansia, no edukasaun hanesan ain-rin ba iha povu no nasaun ida ne’e ni’an futuru, tanba ne’e, ezije duni investimentu ida ne’ebé importante ba ita hotu fó liman ba malu,” haklaken, Arsebispu Arkidioseze Dili ne’e ba jornalista sira, Tersa (21/07/2020), iha Lecidere, Díli.

Iha fatin hanesan, Ministru Edukasaun Juventude no Desportu (MEJD), Armindo Maia, esplika, importante tebes servisu hamutuk ho Dioseze, tanba tuir istória igreja mak hahu edukasaun iha Timor-Leste.

“Ita hotu-hotu hatene katak Ministériu Edukasaun, ita iha arkidioseze nia okos, tanba ne’e papel igreja importante teb-tebes, prontu ita hotu-hotu la’o hamutuk fó liman ba malu, hotu-hotu hatene katak ita hotu serve ba rai ida ne’e, ba Timor-Oan hotu-hotu hanesan sarani, hanesan ema ne’ebé fiar ba Maromak Katoliku, ita hamutuk entre Estadu ho igreja lori buat ne’e ba oin,” afirma, Armindo Maia.

Ministru Edukasaun Joventude Desportu ne’e informa liu tan,  durante ne’e Dioseze Díli mós harii eskola Katolika barak, tanba ne’e, maka presiza tebes hametin kooperasaun entre parte rua hodi prepara kualidade edukasaun ne’ebe mak di’ak ba Timor-Oan sira hotu. Jen