MEJD seida’uk iha previzaun semana 1 aúla-semana 1 la aúla

Ministériu Edukasaun Juventude no Desportu (MEJD), seidauk iha previzaun ba terminasaun, prosesu aprendizajen semana ida iha aula no semana ida laiha aula, tanba COVID-19,  sai nafatin ameasa ba ema nia vida.

Ministru Edukasaun Juventude no Desportu, Armindo Maia, hateten, ho Covid-19, ne’ebé nafatin haleu mundu, tanba ne’e prosesu aprendizajen semana ida iha aula no semana ida laiha aula, seida’uk bele hatene to’o bainhira mak remata.

Tanba ne’e, kada eskola, implementa prosesu aula, ho semana ida iha aula no semana ida laiha ho razaun atu kumpre régra, husi Ministériu Saúde (MS), no Organizasaun Mundiál Saúde (OMS), ne’ebé mak implementa ona, durante Estadu Emerjénsia (EE).

“Prosesu aprendijazen semana sim no semana não, ita reativa fila-fali sistema de aprendijazem oviamente halo tuir kritéria 7 ne’ebé mak determina ona serbisu hamutuk ho ministériu saúde, iha implementasaun iha terenu bom, tanba kestaun distansia sosiál ita hatene katak ita nia sala de aula, tanba ema barak liu to’o 50, 60 pesoas ita distansia sosiál, tanba ne’e, mak opta dia sim dia não, to’o bainhira mak remata enkuantu COVID sei la’o haleu mundu, ha’u labele iha previzaun ita tenke kuidadu di-di’ak ita hotu hakarak fila-fali ba eskola, maibé COVID sei pasiar hela iha mundu ita nia nasaun viziñu, ne’ebé ha’u laiha resposta ba ida ne’e”, afirma, Ministru Edukasaun Juventude no Desportu, Armindo Maia, hafoin priense programa Dader Kmanek, iha GMN Bebora, Tersa (28/07).

Ministru Armindo Maia, esplika, MEJD reativa ona eskola ho porsentu sia nulu, maibé eskola sira iha RAEOA, to’o ohin loron seida’uk reativa eskola.

La’os tanba seidauk priense rekezitu, maibé tanba mudansa estrutura RAEOA, ne’e akontese foin la-lais no iha posibilidade, oin mai sei reativa, hikas prosesu aula.

Alende ne’e, kona-ba merende eskolar, desentraliza ona ba munisípiu hotu no dadaun ne’e, ministériu halo hela fiskalizasaun manual ba nutrisaun hotu, ne’ebé mak atu distribui ba kada eskola. Ina