Estudante Timor-Oan iha Israel konsidera Governu abandona sira

Reprezentante Estudante Timor-Oan iha Israel, Akun Machado, informa, sira ba tuir treinamentu ne’e, Ministériu Agrikultura no Peska (MAP) mak haruka sira ba no to’o agora sira la hetan apoiu ruma, tanba ne’e estudante hirak ne’e konsidera Governu liu husi MAP durante ne’e abandona sira.

“Ami mai iha nasaun ne’e, durante tinan ida ona, liu husi MAP mak haruka mai hodi tuir treinamentu agrikultura avansadu iha ne’e, maibé dezde inísiu ami mai iha nasaun ne’e to’o ohin loron, la hetan atensaun husi Ministériu ne’ebé tutela ba”, Akun Machado ba GMN, Tersa(25/08/2020), liu husi via WhatsApp.

Reprezentante estudante ne’e esplika, durante iha Israel sira la’os de’it tuir treinamentu, maibé sira mós esforsu hodi buka sérvisu, nune’e bele sustenta moris durante hela iha ema nia rai.

“Ami hamutuk 72 ne’e remata ona ami nian treinamentu iha fulan Juñu liu ba, maibé seidauk bele fila ba Timor, tanba situasaun pandemia COVID-19, Alende ne’e estudante sira balun kompañia hapara ona sira-nia servisu, tanba ne’e difísil ona ba ami atu sustenta moris iha situasaun ohin loron nian, nune’e ami mós ezije ba Governu tenke rezolve problema ne’ebé ami infrenta atu ami bele fila ba Timor”, dehan, estudante Timor-Oan iha Israel ne’e.

Estudante iha Israel ne’e, mai husi universidade UNTL, UNITAL, ETCI, UNPAZ, SPP Maliana, Natabora no Fuiloro ne’ebé Governu haruka ba tuir treinamentu kona-bá agrikultura avansadu iha Israel, hahú husi loron14, fulan Agostu, tinan 2019 no remata iha fulan Juñu, tinan ne’e. Jen

Leave a Reply

Your email address will not be published. Required fields are marked *