MS foti ona amostra husi sidadaun ne’ebé kuarentena iha fulan Jullu

Ministériu Saúde (MS), liu husi Laboratóriu Nasionál (LN) foti ona amostra husi sidadaun ne’ebé tama kuarentena iha  loron 29, fulan Jullu, iha kuarentena Tasi Tolu no auto kuarentena.

Atividade foti amostra loron ida iha LN ne’e husi ema na’in 60 no halo teste uza mákina manuál.

Koordenadora Jerál Komisaun Prevensaun COVID-19, Odete Viegas, informa nia parte halo ona enkontru ho funsionáriu iha LN, hodi haree liu ba pilár lima no pilar tolu ninia mekanizmu servisu, oinsá atu bele foti amostra ba ema hirak ne’ebé hela iha kuarentena no auto kuarentena, inklui vijilánsia sentinela.

“Agora ami fó prioridade foti amostra ba ema sira hela iha kuarentena ne’ebé tama antes iha loron 29, fulan Jullu, liu ba, tanba ema hirak ne’e kompleta ona ba loron 12 no bainhira kompleta loron 15 sira tenke sai ona ba ida-idak nia uma”, Koordenadora Jerál Komisaun Prevensaun COVID-19 ne’e ba jornalista sira iha LN, Bidau-Díli, Segunda (10/08/2020).

Nia akresenta mós katak, sidadaun ne’ebé iha kuarentena Tasi Tolu dau-dauk ne’e ekipa tékniku LN hahú ba foti amostra, maibé ba sidadaun Timor-Oan ho estranjeiru ne’ebé foin tama iha loron 5, fulan Agostu, seidauk bele foti amostra, tanba seidauk kompleta loron 12.

“Loron ida ita foti sampel ba ema na’in 50 resin, ita haree forsa traballu ne’ebé sira iha no sampel ne’ebé iha sei halo teste ho mákina manuál, nune’e liu tiha loron 2 foin fó sai rezultadu. Bainhra ema hirak ne’ebé iha kuarentena sai ona, signifika sira-nia rezultadu iha ona, sé sidadaun ida mak hetan pozitivu konserteza sidadaun hotu iha kuarentena tenke hahú fila-fali kuarentena no sura husi loron primeiru. Enkuantu ba hirak ne’ebé negativu tenke sai ona, nune’e fatin kuarentena bele disponivel fali ba maluk hirak ne’ebé karik tama husi Batugade no husi aviaun bele ba kuarentena iha ne’eba”, dehan nia.

Iha fatin hanesan, Diretór Ezekutivu Interinu no Diretór Administrasaun LN, Liborio da Costa Alves, afirma, LN toma konta ba iha pilar lima hodi ba foti amostra loro-loron iha kuarentena no auto kuarentena, inklui mós ema seluk ne’ebé hakarak ba rai-liur.

“Ami ba foti amostra iha kuarentena sira ne’e iha ekipa rua, primeiru ho segundu, envolve ema na’in lima ka hitu mak iha laran no iha rotasaun, ekipa bainhra foti ona amostra iha kuarentena ekipa tuir fali ba iha auto kuarentena”, tenik nia. eni

Leave a Reply

Your email address will not be published. Required fields are marked *