MS mantein estabelese fatin izolamentu iha área fronteira

Diretór Polítika Kooperasaun Ministériu Saúde (MS), Narcisio Fernandes, hateten, MS nafatin iha komitmentu estabelese fatin izolamentu ba iha munisípiu hirak ne’ebé iha área fronteira, liu-liu Bobonaro, Covalima no RAEOA.

“COVID-19 segundu ronde ni’an sei mai tan iha Timor-Leste, bainhira komunidade sira laiha prevensaun sériu, tanba  mosu segundu ronde COVID-19, tanba iha nasaun viziñu sira kazu komesa sa’e, tanba ne’e bainhira estudante Timor-Oan sira iha rai-liur hakat tama mai Timor-Leste  konserteza ba segundu ronde sei akontese, tanba ne’e MS iha komitmentu sei nafatin instala sala izolamentu ba iha ospitál referál Suai, Maliana no RAEOA, inklui mós fatin sira seluk”, Diretór Polítika Kooperasaun MS ne’e liu husi ninia diskursu hafoin simu ekipamentu protesaun husi Uniaun Europeia iha salaun enkontru MS, Caicoli, Segunda (03/08/2020).

Nia akresenta, MS mós sei halo konstrusaun kuarentena iha munisípiu sira, nune’e kontinua asegura Timor-Leste husi COVID-19.

“Ita tenke halo prevensaun másimu, tanba COVID-19 segundu ronde sei mai kuandu ita laiha intervensaun sedu, tanba ne’e ita tenki halo tuir saída mak Governu halo ona, importante mak prevensaun sira hanesan ita halo ne’e tenke kumpre”, katak Narcisio.

Diretór ne’e mós husu ba parseriu sira atu nafatin apoiu MS, hodi tau prioridade ba munisípiu sira, tanba munisípiu sira sei falta rekursu umanu em termos ekipamentu sira sei iha limitasaun. Tanba ida ne’e prevensaun pertinente duke kazu mosu mak ema hotu foin hakfodak.

“Nune’e ho parseiru sira-nia apoiu ba iha munisípiu sira, ha’u hanoin ida ne’e bele ajuda di’ak liu tan Governu, liu-liu halo prevensaun ba COVID-19 iha munisípiu, nune’e sira mós bele prontidaun iha ida-idak nia munisípiu”, Diretór Polítika Kooperasaun MS ne’e. eni