Diareia hamate ema na’in haat no na’in lima mate ho nutrisaun grave

FOTO: GOOGLE

Xefe Interina Departementu Pediatria Hospital Nacional Guido Valadares (HNGV), Lurdes Leão, informa, durante fulan Janeiru to’o Agostu, tinan 2020 HNGV rejistu labarik mate ho kazu diareia hamutuk na’in lima (5) no labarik na’in lima (5) mate ho kazu mal nutrisaun ne’ebé maioria transfere husi Servisu Saúde Munisípiu Ermera (SSME).

“Kazu diareia kada fulan ho númeru 40 to’o 70, númeru kazu diareia ne’ebé iha konsege hamate pasiente (labarik-red) 4, kazu ne’ebé HNGV rejistu mai ho ninia númeru diferente, maibé númeru advezes sa’e no advezes tun, tanba ne’e hahú husi fulan Janeiru HNGV rejistu kazu diareia hamutuk pasiente na’in 50, Febereiru to’o iha Juñu kazu refere menus uitoan kuaze iha de’it kazu 10 to’o 40, maibé iha fulan Jullu kontinua rejistu hikas kazu refere ho pasiente na’in 60 ba fulan ida ne’e no fulan Agostu iha kazu sa’e ba 70. Kazu nia trent tun iha tempu balun, maibé sa’e mós signifikante iha fulan balun, kazu diareia ne’ebé ita rejistu iha labarik ho idade menus husi tinan 5 mai kraik iha pasiente na’in 4 mak lakon vida ka mate”, Xefe Interina Departementu Pediatria HNGV ne’e ba jornalista sira iha HNGV, Segunda (07-09-2020).

Lurdes esplika, husi kazu hirak ne’e akumula ho totál ninia númeru 294 kazu durante fulan ualu (8) nia-laran entre númeru hirak ne’e pasiente (labarik-red) na’in haat (4) mak mate ho nutrisaun  grave no ida (1) seluk mate ho estatutu nutrisaun di’ak.

“Pasiente ho idade minoria (labarik) na’in lima (5) mate ho kazu mal nutrisaun. Durante fulan Janeiru to’o Agostu, tinan 2020, HNGV rejistu kazu mal nutrisaun ho númeru 292 númeru hirak ne’e la’ós ma nutrisaun de’it, maibé inklui mós kazu diareia no husi númeru refere liga ba kazu mal nutrisaun hamate ona labarik ki’ik-oan na’in lima (5) iha HNGV, Pasiente na’in lima (5) baixa ho kazu mal nutrisaun grave, iha kazu mal nutrisaun aguda grave, tanba kontribui ba out came pasiente ni’an, pasiente barak liu mak kuandu tama iha mal nutrisaun grave aguda ida ne’e kategoria risku, nune’e mós sei sai komplikasaun aas liu kompara ho pasiente hirak ne’ebé ho status nutrisaun di’ak,”, tenik Xefe Interina HNGV ne’e.

Entretantu tuir dadus estatístika husi HNGV durante fulan Agostu, tinan 2020, konsege rejistu kazu bebe mate iha inan nia knotak hamutuk na’in neen (6), inklui kazu mortalidade ida (1).

Durante fulan ida nia-laran inan ne’ebé mai partu iha HNGV hamutuk 500 resin, husi númeru refere inan ne’ebé partu hamutuk 483, inan ne’ebé partu normal 346 no inan ne’ebé partu liu husi cesariana na’in 108 no inan ne’ebé partu iha ventosa iha 29, inklui inan ne’ebé partu mai bebé nia kidan mak uluk hamutuk na’in 18. Eni