Profesór kontratadu 15 husi eskola Dom Carlos ladauk simu saláriu

Profesór kontratadu na’in 15 husi Eskola Sekundáriu Jerál Dom Carlos Filipe Ximenes Belo la simu sira-nia saláriu durante tinan hitu (7), maske hato’o bei-beik ona ba Ministériu Edukasaun (ME), maibé to’o ohin loron ladauk iha solusaun.

Koordenadór Eskola Sekundáriu Jerál Dom Carlos Filipe Ximenes Belo, Carlos Ximenes Filipe, hateten, maske Estadu koñese ona eskola refere, maibé Estadu seidauk rekoñese  profesór sira.

“Tanba ne’e ohin ami hala’o audénsia ho Prezidente Parlamentu Nasionál (PN), Aniceto Guterres ho Prezidente Komisaun G PN hodi hato’o ami-nia preokupasaun hodi buka solusaun“, Koordenadór Eskola Sekundáriu Jerál Dom Carlos Filipe Ximenes Belo ba jornalista sira iha PN hafoin hala’o audénsia ho Prezidente PN, Sesta (18-09-2020).

Carlos akresenta, maske ME halo ona promesa iha loron 26, fulan Setembru, tinan 2016, atu asina kontratu iha Institutu Nasionál Formasaun Dosente no Profisionál Edukasaun (INFORDEPE), maibé kontinua laiha rezultadu.

“Maske iha loron 15, fulan Jullu liu ba ME fó orientasaun haruka ami atu loke konta bankária atu asina kontratu, maibé realidade  la asina, tanba ne’e ohin ami hato’o ami-nia preokupasaun ne’e ba Prezidente PN hodi buka solusaun, iha loron 6, fulan Agostu, ME halo ona verifikasaun no ami priense ona rekezitu hein atu asina, Maibé loron 19, fulan Janeiru, tinan 2019, ami-nia maluk la asina, tanba iha lista munisípiu Baucau ne’e totál tama iha lista definitiva 29, na’in 14 asina ,10 resin la asina. Tuir loloos Diretór Edukasaun munisípiu Baucau labele foti desizaun”.

Prezidente Komisaun G PN, António Verdial, promete sei hato’o preokupasaun profesór ni’an ne’e ba ME, hodi buka solusaun.

“Hanesan reprezentante povu, hanesan matan, tilun no ibun ba povu ni’an. Problema ne’ebé mak profesór sira enfreta la’ós ohin mak foin akontese, preokupasaun ne’e la’o kleur loos tiha ona. Hanesan deputadu, PN labele ultrapasa Governu nia servisu, maibé PN iha dever atu hatutan ba ME, hodi trata asuntu refere. Iha loron 19, fulan Janeiru, tinan kotuk, maske totál profesór sira husi munisípiu ne’ebé tama iha lista definitiva hamutuk 20 resin, maibé na’in 14 asina ona no 10 resin seidauk asina”.

Entretantu totál profesór kontratadu iha Timor-Leste hamutuk 40.28, husi númeru refere 400 resin mak asina ona kontratu ho ME. ety