ESTV Railaco husu ME sosa kadeira ho meza ba estudante sira

Diretór Eskola Sekundáriu, Tékniku Vokasionál (ESTV) Railaco, Alberto Martins Trindade, husu Ministériu Edukasaun Juventude no Desportu (MEJD) atu sosa kadeira ho meza ba estudante sira, hodi hala’o prosesu aprendizajen.

Alberto informa mós katak, mezmu konstrusaun edifísiu ESTV finaliza ona foin la-lais ne’e, maibé sei falta fasilidade hanesan meza no kadeira ba estudante no profesór sira.

“Ami agradese simu vizita husi komisaun G Parlamentu Nasionál (PN), hodi haree ami-nia kondisaun direta iha terenu, hodi haree realidade problema ne’ebé mak ami enfrenta durante tinan 4 ona, ami laiha meza ho kadeira, tanba ne’e ami uza Ensinu Báziku nia fatin. Tanba ne’e ho prezensa PN iha tempu badak no bainhira aprova Orsamentu Jerál Estadu (OJE) 2021 bele responde problema ne’ebé ami nia eskola enfrenta”, Diretór ESTV Railaco, munisípiu Ermera, foin la-lais ne’e.

Alende ne’e, Diretór Eskola Bázika 4 de Setembro, Railaco, Sebastião de Oliveira, konsidera, MEJD presiza distribui tan kadeira no meza ba eskola sira, tanba iha eskola balun kadeira no meza la sufisiente.

“Kadeira ho meza ba estudante sira la di’ak hotu ona, maske iha sala de aula naton, maibé laiha kadeira ho meza, tanba estudante okupa sala de aula ho númeru ne’ebé boot, tanba kada sala de aula ida estudante besik 70. Maibé iha sala de aula ida koloka de’it kadeira no meza hamutuk 20 resin de’it no kadeira ho   meza ba estudante alende mós ba profesór sira hodi tur”, tenik Sebastião.

Entretantu ESTV Railaco iha estudante, profesór 21, kompostu permanente na’in 5, kontratadu na’in 4 no profesór parsiál na’in 12. ety