Governu presiza hadia infraestrutura EBF Buibau

Koordenadór eskola Ensinu Báziku Filial (EBF) Buibau, munisípiu Baucau, Sabino Ornai, husu ba Governu liu husi Ministériu Edukasaun (ME) atu hadia infraestrutura iha eskola EBF Primeiru Síkulu no Terseiru Síkulu Buibau, tanba eskola nia kondisaun ladun favorável ona.
“Eskola EBF konstroe iha tinan 1998 haree kondisaun ne’ebé plafon kuak ona, tanba ne’e presiza aumenta sala, laiha biblioteka, laiha kazerna no toilet ba profesór sira, menus profesór. Alénde ne’e mós laiha materiál didátiku hanesan livru referénsia ba profesór no ba estudante, meza, kadeira ba professor, kuadru no administrasaun nian hanesan komputadór ho ninia printer, projetór hodi apoiu aprendizajen no sound system. Ami tenke hato’o ba Parlamentu Nasionál (PN) haree ba kondisaun infraestrutura, susar ba ami bele kobre prosesu aprendizajen no mós manorin sira materia didátiku sira. Ita ko’alia atu dezenvolve setór edukasaun la’o presiza kria kondisaun”, Koordenadór eskola EBF Buibau ne’e ba GMN bainhira komisaun G PN hala’o fiskalizasaun, iha munisípiu Baucau, Kinta, semana ne’e.
Tuir Sabino, eskola refere ninia kondisaun ladun di’ak ona hanesan plafon kuak hotu, menus sala de aula, nune’e difikulta profesór sira atu hanorin estudante.
“Ami orgullu simu vizita hodi komisaun G PN hodi haree kondisaun eskola direta iha eskola EBF, nune’e bele hato’o fali ba ME, hodi tau matan“, dehan Sabino.
Membru komisaun G PN, Sabino Soares “Guntur” sente preokupadu ho kondisaun eskola EBF Buibau, tanba edukasaun mak sai xave importante ba dezenvolvimentu nasionál.
“Tanba saída mak kondisaun diferente ba profesór sira ne’ebé balun dehan permanente, kontratadu no voluntáriu, ne’e hatudu sentidu nasionalizmu ne’ebé boot tebes, ita-nia eroi sira husik iha dalan klaran ohin loron ita ezerse lori tutan ba oin. Tanba ne’e hanesan responsabilidade ba jerasaun ida no ba jerasaun seluk sei la kotuk iha fatin ida, kondisaun eskola iha Timor-Leste enfrenta problema kuaze hanesan de’it”, tenik Guntur.
Maske ho kondisaun eskola EBF Buibau ne’ebé la favorável, komisaun G PN apresia profesór sira-nia esforsu kontinua hanorin estudante sira, maibé iha nafatin vontade hanorin estudante sira.
Entretantu totál estudante iha eskola EBF Buibau hamutuk 200 resin, profesór 18, kompostu husi profesór permanente 12, kontratadu 3, parsiál 3, inklui guarda eskola 1. ety
Add to Comments Here!!!!